Umwepisikopi wa EAR Diyosezi ya Butare, Musenyeri Christophe Nshimyimana, yarobanuye Abapasitori 13 n’Abadiyakoni barindwi, bahita boherezwa mu maparuwasi agiye atandukanye yo muri iyi Diyosezi, ariko anabaha ubutumwa bukomeye ku nshingano bagiye gutangira.
Uyu muhango wabaye ku Cyumweru, tariki ya 31 Gicurasi 2026, ku cyicaro cya Diyosezi ya Butare. Witabiriwe n’abayobozi batandukanye barimo Umuyobozi w’Akarere ka Huye wungirije ushinzwe Iterambere ry’Ubukungu, Kamana André, wari Umushyitsi Mukuru, ndetse n’Abepisikopi ba EAR Diyosezi ya Nyaruguru na Shyogwe.
Mu ijambo rye, Musenyeri Nshimyimana yashimiye aba Bapasitori n’Abadiyakoni bemeye kwakira umuhamagaro wo gukorera Imana, abibutsa ko inshingano bahawe atari iz’icyubahiro gusa, ahubwo ari umurimo wo gukorera abo bayoboye.
Yagize ati: “Kurobanurirwa kuba Pasitori cyangwa Umudiyakoni ni inshingano nziza zizana umugisha iyo zikozwe neza. Mwe mwarobanuwe uyu munsi muhawe inshingano zo kuyobora abandi, ariko mujye mwibuka ko muri abagaragu babo. Mubayobore mu rukundo nk’uko Ijambo ry’Imana ribidusaba.”
Musenyeri Nshimyimana yakomeje abasaba kurangwa n’ubumwe, gukundana no kwirinda icyatuma habaho amacakubiri mu Bakristo bagiye kuyobora.
Yanabibukije ko umurimo wabo uzagira agaciro ari uko bazawukorana ubwitange, bakumva neza inshingano bahawe kandi bagashyira imbere inyungu z’Itorero n’iz’abakristo.
Umuyobozi w’Akarere ka Huye wungirije ushinzwe Iterambere ry’Ubukungu, Kamana André, yashimiye Itorero Anglican by’umwihariko EAR Diyosezi ya Butare ku ruhare rigira mu iterambere ry’abaturage n’imibereho myiza yabo.
Yasabye abarobanuwe kurangwa n’ubunyangamugayo, gukorera abaturage neza no gukunda igihugu, anabibutsa ko bagiye kuba bamwe mu bafite uruhare rukomeye mu kubaka umuryango nyarwanda.
Nyuma y’umuhango wo kurobanura, Abapasitori 13 bahawe impamyabushobozi zibemerera gutangira inshingano zabo nshya, naho Abadiyakoni barindwi na bo bahabwa umugisha wo gutangira umurimo wabo mu buryo bwemewe n’Itorero.
Uyu munsi waranzwe n’ibyishimo, amasengesho n’indirimbo zo gushima Imana, mu gihe abakristo n’abayobozi bari bitabiriye uwo muhango bishimiraga intambwe nshya yatewe na Diyosezi ya Butare mu kongera umubare w’abakozi b’Itorero bagiye gukorera mu bice bitandukanye byayo.
