Mu gihe abantu benshi batekereza ko impano zihenze, ingendo zidasanzwe cyangwa amafunguro y’urukundo ari byo bituma urukundo rukomera, ubushakashatsi bushya bwakozwe na University of Texas bwagaragaje ko hari ikindi kintu cyoroheje ariko gifite imbaraga kurushaho mu kubaka no gukomeza umubano.

Ubwo bushakashatsi bwerekanye ko gusangira inshingano za buri munsi hagati y’abashakanye bishobora kugira uruhare rukomeye mu kongera urukundo, ubusabane ndetse n’ibyishimo mu rugo. Ni ikintu benshi bafata nk’igisanzwe, nyamara kikaba gishobora kuba umusingi ukomeye urinda urugo gusenyuka.

Ibibazo bito bya buri munsi bishobora kubangamira umubano

Ubushakashatsi bwatangajwe mu kinyamakuru cya siyansi cyitwa Personality and Psychology Bulletin bwagaragaje ko ibibazo bito abantu bahura na byo buri munsi ari byo bikunze kugira ingaruka mbi ku mubano kurusha ibibazo bikomeye abantu benshi batekereza.

Ibi bibazo bishobora kuba birimo umubyigano mu muhanda, akazi kenshi, ubutumwa bwinshi bugomba gusubizwa, imirimo yo mu rugo itarangiye cyangwa umunaniro ukabije nyuma y’umunsi muremure.

Nubwo bishobora kugaragara nk’ibidafite uburemere, ubushakashatsi bwerekanye ko bishobora kugabanya igihe abashakanye bamarana ndetse n’ubushake bwo kuganira no kwegerana.

Uko ubushakashatsi bwakozwe

Abashakashatsi bakurikiranye abashakanye 144 bari bamaze igihe gito bashyingiranywe kandi badafite abana.

Mu gihe cy’ibyumweru bibiri, buri wese yasabwaga gutanga amakuru ku bibazo yahuraga na byo buri munsi, urugero rw’umunaniro yagiraga ndetse n’igihe yagiranye ibihe by’urukundo cyangwa ubusabane n’uwo bashakanye.

Ibyavuye muri ubu bushakashatsi byatangaje benshi.

Abashakashatsi basanze ibibazo bito bya buri munsi ari byo byahuzwaga cyane no kugabanuka kw’ubusabane hagati y’abashakanye kurusha ibibazo bikomeye by’ubuzima.

Impamvu umunaniro ugabanya ubusabane

Abashakashatsi basobanuye ko iyo umuntu avuye mu kazi cyangwa mu bikorwa byamunanije umunsi wose, akenshi aba ashaka kubanza kuruhuka no kwigunga gato kugira ngo agarure imbaraga.

Ibi bituma bamwe bagabanya ibiganiro n’abakunzi babo cyangwa bakabura ubushake bwo kumarana igihe.

Iyo ibi bikomeje kuba kenshi, bishobora gutuma habaho intera hagati y’abashakanye nubwo nta makimbirane afatika aba ari hagati yabo.

Abagore bashobora kubigiraho ingaruka kurushaho

Ubushakashatsi bwagaragaje ko abagore bakunze kugira ingaruka nyinshi ku rwego rw’ubusabane iyo bahangayikishijwe n’inshingano nyinshi cyangwa umunaniro.

Abashakashatsi bavuga ko ibi bishobora guterwa n’uko abagore benshi usanga bafite inshingano nyinshi zirimo akazi, kwita ku rugo ndetse no kwita ku bandi bagize umuryango.

Iyo ibyo byose bibaye byinshi, umubiri n’ibitekerezo bishobora kunanirwa ku buryo bigira ingaruka ku buryo umuntu yumva yifuza kwegera mugenzi we.

Igisubizo kiri mu gufashanya

Ubutumwa nyamukuru ubu bushakashatsi butanga ni uko gusangira inshingano hagati y’abashakanye bishobora gufasha cyane mu gukomeza urukundo no kubaka urugo ruzira amakimbirane.

Urugero, iyo umwe afashije undi gukora imirimo yo mu rugo, guteka, koza ibikoresho cyangwa kwita ku bindi bikorwa bya buri munsi, bivanaho igitutu kuri mugenzi we.

Ibi bituma haboneka umwanya munini wo kuganira, kuruhuka no kwishimira kubana.

Abashakashatsi bavuga ko ibikorwa bito byo gufashanya buri munsi bishobora kugira akamaro kurusha impano zihenze cyangwa ibirori bidasanzwe bikorwa rimwe na rimwe.

Ubushakashatsi bwa Kaminuza ya Texas bwerekana ko urukundo rukomeye rutubakwa gusa n’amagambo meza cyangwa impano z’agaciro. Ahubwo rutangirira mu bintu byoroheje bya buri munsi nko gufashanya, gusangira inshingano no kwita ku mibereho ya mugenzi wawe.

Mu yandi magambo, rimwe na rimwe koza amasahani, guteka cyangwa gufasha mu mirimo yo mu rugo bishobora kugira uruhare runini mu gukomeza urukundo kurusha uko abantu benshi babitekereza. Kuri benshi, ibyo ni ibintu bisanzwe; ariko ku rugo ruri mu bibazo, bishobora kuba intambwe ya mbere irusubiza ku murongo.