Urubyiruko rwo muri Gisagara rwabaye bandebereho mu kwesa imihigo, bituma bagenzi babo bo mu tundi turere bajyayo mu rugendoshuri rugamije kwigira ku buryo bakora no ku dushya twabafashije kugera ku musaruro ushimishije.
Mu rugendoshuri rwabereye mu karere ka Gisagara ku wa Gatatu tariki 20 Gicurasi 2026, bamwe mu rubyiruko bagize Inama y’Igihugu y’Urubyiruko (NYC) baturutse mu turere dutandukanye, bagaragaje ko hari byinshi bigiye ku rubyiruko rwo muri aka karere rwabaye urwa mbere mu kwesa imihigo mu mwaka wa 2023-2024.
Ni urubyiruko rugize Inama y’Igihugu y’Urubyiruko mu turere twa Bugesera, Nyagatare, Gasabo na Nyanza, rwari rwagiye kwigira kuri bagenzi babo kugira ngo narwo rurusheho kunoza imikorere no kwesa imihigo rushingiye ku byo rwahigiye.
Umuhuzabikorwa w’Inama y’Igihugu y’Urubyiruko muri Gisagara, Nkotanyi Emmanuel, yavuze ko kimwe mu byabafashije kugera ku musaruro mwiza ari ukwegera urubyiruko bayoboye, kumenya ibibazo rufite no kurufasha kubibonera ibisubizo.
Ati “Ibanga rya mbere ni ukwegera urubyiruko dushinzwe, tukamenya ibibazo rufite tukabafasha no kubishakira ibisubizo ndetse no kubakorera ubuvugizi ku nzego zifata ibyemezo.”
Kampire Valentine, Umunyamabanga w’Inama y’Urubyiruko mu karere ka Gasabo, yavuze ko bakuye amasomo menshi muri uru rugendoshuri, by’umwihariko ku mikorere no gukurikirana ibikorwa byakozwe.
Ati “Twabonye hari byinshi bakoze neza, twifuje natwe kuba twazanoza birushijeho, cyane cyane uburyo bafite imibare igaragaza ibyo bakoze kuva umwaka watangira kugeza ubu. Ni ikintu twabonye cyatanga umusaruro natwe tukigenderaho.”
Uru rugendoshuri rwabaye ku bufatanye na VSO Rwanda, ikigo gikorana n’abakorerabushake bagamije iterambere. Umuyobozi wacyo, Murangira Gakuba Franklin, yavuze ko bafite gahunda yo gukomeza gufasha urubyiruko rwo mu turere dutandukanye kwigiranaho.
Ati “Twatangiye dukorana n’uturere tune: Bugesera, Nyagatare, Gasabo na Nyanza. Turimo gushaka amikoro kugira ngo uko agenda aboneka tuzagure ibikorwa no mu tundi turere.”
Umuyobozi w’Akarere ka Gisagara Wungirije Ushinzwe Iterambere ry’Ubukungu, Habineza Jean Paul, yashimye uruhare rw’urubyiruko mu iterambere ry’akarere, arusaba gukomeza kwimakaza imikoranire no kwirinda imyitwarire mibi.
Ati “Iyo inzego z’urubyiruko zikoranye neza n’ubuyobozi, bigira uruhare runini mu kugera ku ntego. Urubyiruko rukwiye kandi kwirinda ingeso mbi no gukomeza kuba urugero rwiza.”
Mu myaka itanu ishize, komite nyobozi y’Inama y’Igihugu y’Urubyiruko mu karere ka Gisagara imaze gukora ibikorwa byafashije urubyiruko 96,997, bifite agaciro ka miliyoni 381,055,000 Frw. Ubuyobozi bw’uru rubyiruko buvuga ko bufite intego yo gukomeza guhanga udushya kugira ngo barusheho kunoza ibikorwa byabo.
