Sosiyeti ikora ubwikorezi bwo mu kirere ya RwandAir yatangiye ingendo zerekeza mu kirwa cya Zanzibar muri Tanzania, ndetse isubukura ingendo zerekeza mu mujyi wa Mombasa muri Kenya.Ni mu itangazo bashyize hanze kuri uyu wa Mbere, rivuga ko izi ngendo zihita zitangira gukorwa guhera tariki ya 1 Ukuboza 2025.Izi njyendo za Kigali-Zanzibar-Mombasa zizajya zikorwa kane mu Cyumweru, ku wa Mbere, ku wa Gatatu, ku wa Gatanu no ku Cyumweru, hakoreshejwe indege yo mu bwoko bwa Boeing B737.

Ni mu buryo bwo korohereza abagenzi bajya ku kirwa cya Zanzibar byajyaga bisaba kubanza kunyura Dar-Salama bakaba bafata ubwato cyangwa bagategerayo indege.Ingendo zijya Mombasa zari zarahagaritswe gukorerayo mu 2019, mu gihe icyerekezo cya Zanzibar ari gishya bizasiga u Rwanda rukorera mu byerekezo bitatu muri Tanzania na bibiri muri Kenya.

Umuyobozi mukuru wa RwandAir, Yvonne Makolo, yavuze ko gusubukura ingendo muri Mombasa no gutangiza ingendo zijya Zanzibar ni urugendo rwo kwagura imikorere mu Burasirazuba bwa Afurika.Ati” Kugaruka muri Mombasa no gutangiza ingendo za Zanzibar ni intambwe ikomeye mu rugendo rwacu rwo kwaguka no kongera imiyoboro yacu mu Burasirazuba bwa Afurika, turushaho gutuma Kigali iba igicumbi cy’ubwikorezi bwo mu kirere, tugaha abatugana amahirwe menshi yo gutembera mu Karere ndetse no gufungura amarembo y’ubucuruzi n’ubukerarugendo bityo tugashyigikira ubufatanye bwa Karere.”

Muri gahunda ya Guverinoma y’imyaka itanu yo kwihutisha iterambere, harimo ko mu rwego rwo guteza imbere ubwikorezi bwo mu kirere, hazongerwa ibyerekezo RwandAir yajyagamo.Ibi bizajyendana no kongera umubare w’abagenzi bagenda na RwandAir ku buryo umubare wazikuba kabiri.