Kuri uyu wa 04 Mata 2026, ubutegetsi bwa Repubulika Iharanira Demokarasi ya Congo (RDC) n’ubw’u Burundi byatangiye ibiganiro byihariye bigamije gushaka uburyo burambye bwo gucyura impunzi z’Abanye-Congo zahunze imirwano yabereye muri teritwari ya Uvira, mu Ntara ya Kivu y’Amajyepfo, mu mpera za 2025.
Ibi biganiro biri kubera i Kalemie mu Ntara ya Tanganyika, byitabiriwe n’inzego zitandukanye zirimo n’Ishami ry’Umuryango w’Abibumbye ryita ku Mpunzi (UNHCR), rifasha mu gushakira ibisubizo ibibazo by’impunzi mu karere.
Guverineri wa Kivu y’Amajyepfo, Jean-Jacques Purusi, yatangaje ko hagamijwe gushyiraho ingengabihe n’uburyo bufatika bwo gucyura impunzi ziri mu Burundi no muri Tanzaniya, zirimo iziri i Bujumbura, Gitega, Cibitoke no mu nkambi zo muri Tanzaniya.
Imirwano yabereye i Sange no mu mujyi wa Uvira mu Ukuboza 2025, yahanganishije ihuriro AFC/M23 n’ingabo za Leta ya RDC, yateje ubuhunzi bukomeye. Abasaga miliyoni 1.2 bahungiye imbere mu gihugu, mu gihe abarenga ibihumbi 800 bahungiye mu bihugu by’abaturanyi.
Mu gihe AFC/M23 yagenzuraga Uvira, u Burundi bwafunze umupaka wa Gatumba mu rwego rwo kwirinda umutekano muke, bituma impunzi nyinshi zibura uko zisubira iwabo. Nubwo nyuma y’aho uwo mupaka wongeye gufungurwa mu ntangiriro za 2026, abatahutse bakomeje kuba bake.
Kugeza ubu, ibiganiro biri kwibanda ku gucyura impunzi ku bushake, mu mutekano no mu cyubahiro cy’uburenganzira bwa muntu. Icyakora, haracyari imbogamizi zirimo umutekano muke muri Uvira na Sange, ibikorwaremezo byarangiritse, kutizerana hagati y’impande zishyamiranye ndetse n’ubushobozi buke bwo kwakira abatahutse.
Abasesenguzi bavuga ko nubwo ibi biganiro ari intambwe ikomeye, bizasaba ubufatanye bukomeye bw’impande zose kugira ngo impunzi zishobore gutahuka mu buryo burambye.
