Umusore witwa Sindayigaya Evariste uri mu kigero cy’imyaka 19 y’amavuko, wo mu Murenge wa Bweyeye, mu Karere ka Rusizi, arashakishwa n’inzego z’umutekano akekwaho kwica inyamaswa y’icyondi yo muri Pariki y’Igihugu ya Nyungwe akoresheje imbwa.
Ibi byabereye mu Mudugudu wa Muhiza, mu Kagari ka Nyamuzi, mu Murenge wa Bweyeye, mu Karere ka Rusizi, mu Ntara y’Iburengerazuba.
Umwe mu barinzi ba Pariki y’Igihugu ya Nyungwe, ku gice cy’Umurenge wa Bweyeye, yasobanuye uburyo uwo musore yishe icyo cyondi.
Yagize ati:”Yakibonye gitembera ku mukandara wa nyungwe mu cyanya gikomye, kiri cyonyine afata imbwa ajya kucyica. Abana 3 biga ku ishuri ribanza rya Nyamuzi baramukurikira. Akigezeho cyabonye gisumbirijwe kirataka cyane, imbwa igiye kugifata kiyishwaratura mu nda, imbwa igifata mu mugongo iragikomeza uwo musore ahita acyica.Abo bana bahise batabaza, abaturanyi bari hafi aho baratabara umusore arabacika nubu aracyashakishwa. Imbwa yo abo bana bayifashe. Twabimenyesheje abadukuriye icyondi baraza barakijyana kuko iyo bigenze bityo bajya kugihamba aho abaturage batagitaburura ngo bakirye.”
Yakomeje avuga ko hahise haba inama n’abaturage, hafatwa umwanzuro ko abo bana bajyanwa ku biro by’Akagari ka Nyamuzi bakaganirizwa, kuko iyo bahita batanga amakuru aho gukomeza kumukurikira gusa bashungera kandi babona afite umugambi wo kucyica, cyari gutabarwa kitarincwa.Ati:”Nubwo ubukangurambaga buhoraho abaturage baganirizwa ku burenganzira bwa ziriya nyamaswa n’abanyeshuri bakabukangurirwa, hari bamwe muri bo basa n’abatarabyumva neza, cyane cyane nk’abo bana bamukurikiye bashungera aho gutanga amakuru. Twasanze ari ngombwa ko baganirizwa ubutaha ntibazongere guha icyuho umugizi wa nabi nkuwo.”
Umuturage wo mu Mudugudu wa Muhiza, avuga ko nyuma yo kongera kuganirizwa, basabye imbabazi ku byakozwe n’uyu musore n’uburangare abo bana babigizemo ntibatangire amakuru ku gihe bigatuma ubuzima bwa kiriya cyondi buhatakarira.Ati:”Bongeye kutwibutsa imibanire myiza na ziriya nyamaswa, cyane cyane ko icyondi cyo kitananduranya, nta n’ibyo cyangiza cyane nk’ibitera, ko kugisanga aho cyibereye ukacyica ari ukugihohotera bikabije,binahanwa n’abategeko. Twabyumvise,dusaba imbabazi,twiyemeza kubwira abana bacu kutazongera gukora ikosa ryo kurebera uwangiza pariki n’ibiyirimo.”
Umunyamabanga Nshigwabikorwa w’Umurenge wa Bweyeye, Rwango Jean de Dieu, yongeye kwibutsa abaturage ko kizira kikaziririzwa kwangiza Pariki y’Igihugu ya Nyungwe n’ibiyirimo.Yagize ati:”Turongera kwibutsa abaturage ko kizira kikaziririzwa kujya muri Pariki ya Nyungwe kugira icyo uyikoramo utari umukozi wayo cyangwa inzego z’umutekano. Birinde kwishoramo kujya guhingamo, guhakura, kuritwika cyangwa kwangiza inyamaswa n’ibimera birimo.”
Rwango yakomeje avuga ko umusore ukekwaho kwica iyo nyoni agishakishwa n’inzego zibishinzwe kugira ngo abiganirwe mu mategeko.
Icyo amategeko ateganya ku cyaha akurikiranyweho
Itegeko rigena urusobe rw’ibinyabuzima rigena ibyaha n’ibihano ku muntu wese wakoze amakosa agize icyaha kibangamira urusobe rw’ibinyabuzima.
Ingigo yaryo ya 58 ivuga ko gutwara cyangwa kwangiza igi cyangwa icyari by’inyamaswa zo mu gasozi aba akoze icyaha. Iyo abihamijwe n’urukiko, ahanishwa igifungo kitari munsi y’amezi atandatu ariko kitarenze imyaka ibiri n’ihazabu y’amafaranga y’u Rwanda atari munsi y’ibihumbi magana atanu ariko atarenze miliyoni imwe y’amafaranga y’u Rwanda.
Ingingo irebana no gukura inyamaswa mu ndiri kamere yayo, kuyigirira nabi, cyangwa kuyizerereza, nabyo hari abakunze kubikora bibwira ko bitagize icyaha gusa itegeko rivuga ko mu ndiri kamere yayo, uyigirira nabi cyangwa uyizerereza aba akoze icyaha.Iyo abihamijwe n’urukiko, ahanishwa igifungo kitari munsi y’amezi atandatu ariko kitarenze imyaka ibiri n’ihazabu y’amafaranga y’u Rwanda atari munsi y’ibihumbi magana atanu ariko atarenze miliyoni imwe y’amafaranga y’u Rwanda.Ni itegeko rikubiyemo ibyaha bigizwe n’ibice bibiri birimo ibyaha bikorewe ibinyabuzima ndangasano, ibyaha bikorerwa ahantu hakomye birimo gutwika bihanishwa igifungo hagati y’imyaka itatu n’itanu ariko iyo bikorewe muri Pariki y’igihugu igifungo kikaba hagati y’imyaka itanu n’icumi n’ihazabu y’amafaranga y’u Rwanda itari munsi ya miliyoni zirindwi ariko ntarenge miliyoni 10 Frw.
