Imodoka itwara abagenzi ya sosiyete ya Volcano Express yakoze impanuka ikomeye ku mugoroba wo kuri uyu wa Kabiri, tariki ya 8 Mata 2025, ubwo yarenze umuhanda igahita imanuka, ihitana umushoferi wayo, mu gihe abagenzi 22 bari bayirimo bakomerekeye mu buryo butandukanye.
Iyi mpanuka yabereye mu Murenge wa Mbazi, Akagari ka Tare, Umudugudu wa Kagarama, ahazwi nka Gashikiri, ku muhanda wa kaburimbo uhuza Akarere ka Huye n’aka Nyamagabe. Ni mu ikorosi riri ahantu hamanuka.
Nk’uko byemejwe n’Umuyobozi wa Volcano Express ishami rya Huye, Havugimana Emmanuel, imodoka yakoze impanuka yari imaze akanya gake ihagurutse muri gare ya Huye yerekeza i Nyamagabe.
Yagize ati: “Imodoka yahagurutse saa cyenda z’igicamunsi, igeze mu ikorosi rya Gashikiri, umushoferi ntiyabasha kugenzura umuvuduko, irenga umuhanda igonga ibyuma byo kurinda imodoka, iramanuka.”
Umuvugizi wa Polisi y’u Rwanda, ishami rishinzwe umutekano wo mu muhanda, SP Emmanuel Kayigi, na we yemeje ko impanuka yatewe no kutagenzura umuvuduko ahantu hamanuka.
Yagize ati: “Iyi mpanuka yahitanye umushoferi wari utwaye imodoka, abagenzi 22 bakomereka, bane muri bo bakomeretse bikomeye. Abakomerekeye muri iyi mpanuka bajyanywe kuvurirwa mu bitaro bya CHUB n’ibya Kabutare.”
SP Kayigi yasabye abatwara ibinyabiziga gukomeza kwitwararika, bubahiriza amategeko agenga umuhanda, birinda umuvuduko ukabije n’uburangare bushobora guteza impanuka kuko zifite ingaruka zikomeye.
