Mu gihe ibiganiro bigamije gushaka amahoro n’umutekano mu Burasirazuba bwa Repubulika Iharanira Demokarasi ya Congo bikomeje kubera i Burayi, ihuriro rya AFC/M23 rikomeje kugaragaza icyizere n’umuhate wo gushaka impinduka mu miyoborere y’igihugu.
Noël Mbatshi, umwe mu bayobozi b’iri huriro, yashimye abagize itsinda rya AFC/M23 bitabiriye ibiganiro biri kubera mu Busuwisi, barimo Franck Mwe di Malila Apenela na Claude Ibanlanky. Yavuze ko ubwitabire bwabo ari ikimenyetso cy’ubushake bwo gushaka ibisubizo birambye ku bibazo igihugu kimazemo igihe.
Yagaragaje ko kuba iri tsinda ririmo abantu bafite ubunararibonye mu bya politiki no mu miyoborere, byongera icyizere cy’abifuza impinduka muri RDC.
Mbatshi yavuze ko AFC/M23 ishaka kubaka igihugu gishingiye ku bumwe, ubwigenge n’icyubahiro cy’abaturage, asaba abafite impungenge gushyira hamwe bagashyigikira urugendo rw’impinduka.
Ibi biganiro bibaye mu gihe mu Burasirazuba bwa RDC hakomeje imirwano hagati y’ingabo za Leta n’abarwanyi ba AFC/M23, ibintu bikomeje guteza impungenge abaturage.
Ku ruhande rwa Leta ya RDC, ikomeje gushinja uyu mutwe guteza umutekano muke no gufashwa n’ibihugu byo hanze, ibyo AFC/M23 ihakana.
Imiryango mpuzamahanga ikomeje gusaba impande zombi gushyira imbere ibiganiro aho gukomeza intambara, mu rwego rwo kurinda abasivili no kugarura ituze.
Abasesenguzi bemeza ko ejo hazaza ha RDC hashobora kugenwa n’umusaruro uzava muri ibi biganiro biri kubera i Burayi.
