Mu murwa mukuru wa Repubulika Iharanira Demokarasi ya Congo, Kinshasa, hongeye kuba umwuka mubi w’umutekano nyuma y’imirwano ikomeye yadutse hagati y’abasirikare ba FARDC n’abapolisi mu gace ka Makala, ibintu byasize abaturage benshi mu bwoba no mu rujijo.

Aya makimbirane yatangiye ku mugoroba wo ku wa 21 Mata 2026, nyuma y’igikorwa cyo gucunga umutekano cyabereye mu gace ka Mabulu ku muhanda wa Elengesa. Aho ni ho abapolisi bari mu mukwabu wo gufata urubyiruko rukekwaho ubujura n’ibindi bikorwa by’ubugizi bwa nabi. Icyo gikorwa cyahise kivamo kutumvikana hagati y’inzego zombi, biza kuvamo kurasana gukomeye.

Amasasu yumvikanye mu bice bitandukanye bya Makala, cyane cyane ku mihanda ya Kibambi 1 na Croquet, aho abaturage benshi bahise bikingirana mu ngo zabo, abandi bahunga bafite ubwoba bwinshi. Ubuzima busanzwe bwahise buhagarara, ibikorwa byinshi biradindira.

Mu kavuyo katewe n’iyo mirwano, amatsinda y’urubyiruko azwi ku izina rya “Kuluna”, asanzwe azwiho urugomo muri Kinshasa, na yo yahise atangira gusahura no kwiba mu bice bimwe na bimwe byari byabuze umutekano.

Amakuru ava muri ako gace avuga ko poste ya polisi iri ku muhanda wa Kimfumu yangiritse bikomeye, bamwe bakavuga ko yasenywe hafi ya yose. Ibi byagaragaje ubukana bw’iyo mirwano n’ingaruka zayo ku mutekano rusange.

Umuyobozi wa Makala, Ngudia Kabongo, yageze aho ibyo bibazo byabereye ari kumwe n’inzego z’umutekano, atangaza ko nta muntu wahasize ubuzima muri ayo makimbirane, ariko yemera ko ibyangiritse ari byinshi cyane, cyane cyane ku imitungo y’abaturage n’ibikorwaremezo bya Leta.

Aka gace ka Makala gasanzwe kazwiho ibibazo by’umutekano muke, ahanini biterwa n’udutsiko tw’abagizi ba nabi nka Kuluna, tumaze igihe dushinjwa guteza urugomo no guhungabanya ituze ry’abaturage.

Iyi mirwano hagati y’abasirikare n’abapolisi yongeye gutera impungenge benshi, kuko ari inzego zombi zari zikwiye gufatanya mu kurinda abaturage no kubungabunga umutekano.

Nubwo ituze ryatangiye kugaruka buhoro buhoro, abaturage ba Makala baracyari mu bwoba. Basaba ubuyobozi bwa Congo gufata ingamba zikomeye zo kunoza imikoranire y’inzego z’umutekano no gukumira ko ibintu nk’ibi byongera kuba.

Kugeza ubu, ubuyobozi ntiburatangaza imibare nyayo y’ibyangiritse byose, kandi nta perereza rirambuye riratangazwa kuri iyi mirwano, ibintu bikomeje gutuma benshi bibaza icyakorwa kugira ngo umutekano ugaruke by’ukuri.