APR FC yatomboye Les Aigles du Congo yo muri Repubulika Iharanira Demokarasi ya Congo (DR Congo) mu ijonjora ry’ibanze rya CAF Champions League, mu gihe niramuka iyisezereye ishobora guhura na Zamalek yo mu Misiri mu cyiciro gikurikiraho.

Tombola y’ijonjora ry’ibanze rya CAF Champions League yasize APR FC igomba guhura na Les Aigles du Congo yo muri DR Congo.

Kuri uyu wa Kane tariki ya 6 Kanama 2026, nyuma ya tombola ya CAF Confederation Cup yasize Rayon Sports yerekeje muri Cameroun gukina na Panthere Sportive, hahise hakurikiraho tombola ya CAF Champions League.

APR FC ni yo izahagararira u Rwanda muri iri rushanwa. Muri tombola yakoreshejwe n’abarimo Karekezi Olivier wabaye kapiteni w’Ikipe y’Igihugu Amavubi ndetse wanakiniye APR FC, yatomboye Les Aigles du Congo yo muri DR Congo.

Umukino ubanza uzabera muri DR Congo.

Ikipe izakomeza muri iri jonjora izahura n’izakomeza hagati ya AS Port yo muri Djibouti na Zamalek, bivuze ko APR FC ishobora kwisanga ihatanye n’iyi kipe ikomeye yo mu Misiri niramuka ibanje kurenga Les Aigles du Congo.

Iri jonjora ry’ibanze, imikino ibanza izakinwa hagati ya tariki ya 4 na 6 Nzeri 2026, mu gihe iyo kwishyura iteganyijwe hagati ya tariki ya 11 na 13 Nzeri 2026.

Umwaka ushize APR FC ntiyagize amahirwe yo kurenga iki cyiciro cy’ijonjora ry’ibanze kuko yasezerewe na Pyramids FC.