Umusirikare wo mu ngabo za Repubulika Iharanira Demokarasi ya Congo (FARDC) yatawe muri yombi akekwaho kwica umuturage, mu ijoro ryo ku Cyumweru tariki ya 3 Gicurasi 2026, mu gace ka Bushimoo kari mu giturage cya Pinga, muri teritwari ya Masisi mu Ntara ya Kivu y’Amajyaruguru.
Amakuru atangwa n’inzego z’umutekano muri ako gace avuga ko ibi byabaye nyuma y’amakimbirane yo mu muryango yavuyemo imirwano ikomeye. Uwo musirikare, bivugwa ko ari uwo muri Regiment ya 3304, yari mu bushyamirane bukomeye n’umugore we mu rugo rwabo.
Mu kugerageza guhunga ayo makimbirane, umugore yirutse ajya kwihisha mu rugo rw’umuturanyi, ibintu byaje gufata indi ntera nk’ uko ikinyamakuru Actualite.cd dukesha aya makuru kibivuga .
Umuturanyi witwa Munguiko Kabirikangu yagerageje gutabara no gutandukanya abo bombi, ashaka kurinda uwo mugore. Icyakora, uwo musirikare yahise arasa uwo muturanyi, aramwica.
Nyuma yo gukora icyo cyaha, amakuru akomeza avuga ko uwo musirikare yafashe umurambo awujyana kuwujugunya mu ruzi rwa Mweso, mu gushaka guhisha ibimenyetso.
Umurambo wa nyakwigendera wabonetse mu gitondo cyo ku wa Kabiri tariki ya 5 Gicurasi, ahagana saa kumi n’ebyiri za mu gitondo, i Bushimoo mu gace ka Bashali Mokoto, bituma abaturage bagira agahinda n’uburakari bwinshi.
Inzego z’umutekano i Pinga zemeje ko ukekwaho icyaha yamaze gutabwa muri yombi, mu gihe hategerejwe ko inzego z’ubutabera zitangira kumukurikirana.
Ibi byongeye kuzamura impungenge ku myitwarire ya bamwe mu basirikare bakorera mu duce tumaze igihe dufite ibibazo by’umutekano muke nka Masisi. Abaturage n’imiryango itegamiye kuri Leta basaba ko ubutabera bwihutishwa, hagamijwe gukumira umuco wo kudahana no kongera icyizere hagati y’abaturage n’inzego z’umutekano.
