Perezida wa Repubulika Iharanira Demokarasi ya Congo, Félix Tshisekedi, yategetse Guverinoma gutangira byihuse inzira zose zigamije kwemeza ku mugaragaro ko agace ka Nkamba kagirwa umujyi mutagatifu (ville sainte), mu cyemezo gifatwa nk’intambwe ikomeye ishobora guhindura amateka y’iyobokamana n’ubukerarugendo muri iki gihugu.Iki cyemezo kije mu gihe Nkamba isanzwe ifatwa nk’ihuriro rikuru ry’iyobokamana ku bayoboke b’Itorero rya Kimbanguiste ku isi, aho ifite igisobanuro gikomeye mu myemerere yabo. Kuyigira umujyi mutagatifu ni uburyo bwo kuyihesha agaciro karushijeho no kuyizamura ku rwego mpuzamahanga.
Nk’uko byatangajwe n’Umukuru w’Igihugu, uyu mushinga ugamije kubungabunga ubusugire n’umwimerere w’aka gace gafite amateka akomeye mu by’iyobokamana. Harimo gushyiraho amategeko n’amabwiriza agenga ingendo nyobokamana (pèlerinage), ndetse no kurengera umurage ndangamateka n’uw’iyobokamana ubarizwa muri aka gace.Ni gahunda kandi igamije kuzamura ubwamamare bwa Nkamba ku rwego mpuzamahanga, bityo ikarushaho gukurura abakerarugendo n’abakirisitu baturutse hirya no hino ku isi.
Nkamba iherereye mu Ntara ya Kongo Central, ni ho ibikorwa by’iyobokamana bya Simon Kimbangu byatangiriye mu 1921. Uyu muyobozi w’iyobokamana afatwa nk’umuhanuzi n’abayoboke be, nyuma yo gutangiza inyigisho zaje kuvamo Itorero rya Kimbanguiste.
Église Kimbanguiste ni rimwe mu matorero akomeye ku mugabane wa Afurika, rifite abayoboke babarirwa muri za miliyoni, cyane cyane muri RDC no mu bihugu by’i Burayi.
Buri mwaka, Nkamba yakira imbaga y’abayoboke n’abakerarugendo baza kuhakorera ingendo nyobokamana, by’umwihariko ku itariki ya 6 Mata hizihizwa ivuka rya Simon Kimbangu, umunsi wanagizwe uw’ikiruhuko rusange muri RDC.
Abasesenguzi bagaragaza ko, mu gihe uyu mushinga wazashyirwa mu bikorwa neza, Nkamba ishobora guhinduka kimwe mu byerekezo bikomeye by’ingendo nyobokamana ku rwego rwa Afurika n’isi yose.
Ibi bishobora no kuzamura ubukungu bw’Intara ya Kongo Central binyuze mu bukerarugendo, ndetse bikongerera RDC amahirwe yo guteza imbere ubufatanye mpuzamahanga mu bijyanye n’iyobokamana n’umuco.
Nubwo hari icyizere gikomeye kuri uyu mushinga, hari n’imbogamizi zishobora kuwugora. Harimo gukenera ishoramari rinini mu bikorwa remezo nk’imihanda, amacumbi n’izindi serivisi zakira abashyitsi benshi.
Hari kandi gukenera uburyo bunoze bwo gucunga ubwinshi bw’abasura hatabangamiwe umutekano n’ubusugire bw’ahantu hatagatifu, ndetse no gushyiraho amategeko asobanutse azagenga ibikorwa byose bijyanye n’uyu mujyi.
Muri rusange, icyemezo cya Perezida Tshisekedi kigaragaza ubushake bwa Leta ya RDC bwo guha agaciro gakwiye umurage w’iyobokamana n’umuco, no kuwubyaza umusaruro mu iterambere ry’igihugu.
Niramuka ishyizwe mu bikorwa neza, Nkamba ishobora kuba kimwe mu bimenyetso bikomeye by’iyobokamana ku mugabane wa Afurika no ku rwego mpuzamahanga, ndetse ikanahinduka igicumbi cy’iterambere rirambye ku baturage b’aka karere.
