Agahigo k’imikino 14 Real Madrid yari imaze idatsindwa kakuweho na Lille Olympique Sporting Club, aka Bayern Munich ko kumara imikino 42 idatsindwa umukino n’umwe wo mu matsinda ya UEFA Champions League gashyirwaho iherezo na Aston Villa; Atletico Madrid itsindirwa muri Portugal na Benfica Lisbon muri byinshi byaranze ijoro ryo kuri uyu wa Gatatu.
Ni ibikubiye mu birori by’imikino ihuza amakipe yabaye aya mbere iwayo ku Mugabane w’u Burayi, UEFA Champions League ya 2024/2025 yagarutse mu ishusho ivuguruye yakomezaga kuri uyu wa Gatatu tariki 02 Ukwakira 2024 hakinwa imikino ya kabiri mu mikino umunani igize icyiciro cya mbere.
Umwe mu mikino yari itegerejwe na benshi, ni uwo Real Madrid ifite igikombe giheruka, yari yasuyemo Lille yo mu Bufaransa mu mukino wabereye kuri yayo Stade Pierre-Mauroy yari yakubise yuzuye abafana bamabaye amabara y’Umutuku n’Umukara.
Uyu mukino warangiye mu mayobera, aho igitego cyatsinzwe n’Umunyamerika, Jonathan David kuri penaliti yabonetse mu minota y’inyongera y’igice cya mbere nyuma y’uko Edouardo Camavinga wari umaze igihe yaravunitse yakoraga umupira n’ikiganza mu rubuga rwe, ni cyo cyahesheje intsinzi iyi kipe yo mu Bufaransa.
Wabaye umukino wa mbere iyi kipe ibitse ib bikombe 15 yari yatakaje kuva muri Gicurasi 2023 aho yari imaze imikino 14 idatsindwa muri iri rushanwa.
Undi mukino wari wahuruje imbaga, ni uwakiniwe kuri Stade Villa Park ya Aston Villa. Umunya-Columbia, Jhon Durán yafashije Aston Villa gutsinda Bayern Munich igitego 1-0 ku munota wa 79, ihagarika urugendo rw’imikino 41 iyi kipe yo mu Budage yari imaze idatsindwa mu matsinda cyangwa imikino ibanza itari iyo gukuranwamo muri UEFA Champions League.
Mu yindi mikino, Girona yo muri Espagne yatsinzwe na Feyenoord ibitego 3-2, Shakhtar Donetsk inyagirwa na Atalanta 3-0. Ni ibitego bya myugariro Djimsiti, Ademola Lookman na Bellanova; naho Benfica yihererana Atlético Madrid iyitsinda ibitego 4-0.
Dinamo Zagreb yanganyije na AS Monaco ibitego 2-2, Liverpool itsinda Bologna ibitego 2-0, RB Leipzig itsindwa na Juventus y’abakinnyi 10 ibitego 3-2. Nubwo Benjamin Šeško yari yatangiye afasha Leipzig gutangirana inkoni atsinda ibitego bibiri, ibitego bibiri by’Umunya-Seribiya, Dusan Vlahovic n’icy’Umunya-Portugal, Francesco Conceição babihinduye imfabusa, mu gihe Sturm Graz yatsinzwe na Club Brugge igitego 1-0.
Igitego Umunya-Misiri, Mohamed Salah Mahrous Hamed yatsindiye Liverpool imbere ya Bologna kuri uyu mugoroba cyatumye aba Umunyafurika wa mbere ugejeje ibitego 45 muri UEFA Champions League. Ararusha Umunya-Ivory Coast, Didier Drogba Yves ufite ibitego 44.
Umunsi wa Gatatu w’iri rushanwa uzakinwa tariki ya 22 n’iya 23 Ukwakira mu gihe uwa kane uteganyijwe tariki ya 5 n’iya 6 Ugushyingo 2024.
Kugera ubu, amakipe ataratsindwa umukino n’umwe ni Borussia Dortumund, Stade Brestois, Benfica Lisbon, Bayer Leverkusen, Liverpool, Aston Villa, na Juventus de Torino zikaba ari nazo ziyoboye urutonde.
