Ikipe ya Mukura Victory Sports et Loisirs yatangaje rutahizamu w’Umunya-Ghana, Agyenim Boateng Mensah wakiniraga Dreams FC yo mu Cyiciro cya Mbere muri Ghana.
Ni igikorwa iyi kipe yanyujije ku mbuga nkoranyambaga zayo kuri uyu wa Gatanu taliki 26 Nyakanga 2024.
Uyu rutahizamu w’imyaka 27 yashyize umukono ku masezerano y’imyaka ibiri muri iyi kipe yambara Umuhondo n’Umukara ibarizwa mu karere ka Huye.
Boateng Mensah ni we mukinnyi wa Kabiri watsinze ibitego byinshi muri Shampiyona y’icyiciro cya mbere muri Ghana. Yanafashije ikipe ye ya Dream FC kugera muri ½ cy’imikino ya CAF Confederations Cup.
Mensah yanyuze mu Ikipe ya Nzema Kotoko yabayemo imyaka ine, yavuyemo mu 2020 yerekeza muri Dreams FC yabayemo indi ine. Mu mikino 117 yatsinzemo ibitego 37.
Uyu mukinnyi yiyongereye kuri myugariro Abdul Jalilu wari kapiteni we muri Dreams FC na we Mukura iheruka kugura.
Muri uyu mwaka, iyi Kipe y’i Huye ikomeje kugaragaza imbaraga zikomeye kubera uko iri kwitwara ku isoko ry’igura n’igurisha.
Iyi kipe yaguze Vincent Adams wayisubiyemo avuye muri Bugesera FC, Ishimwe Jean Rene n’umunyezamu Tuyizere Jean Luc yakuye muri Marines FC, Uwumukiza Obed wavuye muri Muhazi United, Jordan Nzau Ndimbumba wavuye muri Etincelles FC ndetse na Niyonizeye Fred wavuye muri Vital’O FC.
