Ikipe ya Arsenal yatsinze PSG ibitego 2-0, Manchester City inyagira Slovan Bratislava, Borussia Dortmund itsinda Celtic ibitego 7-1, Barcelona yaherukaga gutsikira muri La Liga ikosora Young Boys na ho Stade Brestois yo mu Bufaransa ikomeza kuvuna umuheha umwe ikongerwa ibiri.
Ni ibikubiye mu birori by’imikino ihuza amakipe yabaye aya mbere iwayo ku Mugabane w’u Burayi, UEFA Champions League ya 2024/2025 yagarutse mu ishusho ivuguruye. Kuri uyu wa Kabiri tariki 01 Nzeri 2024 hari hakomeje imikino ya kabiri mu mikino umunani igize icyiciro cya mbere.
Umwe mu mukino yari ihanzwe amaso wabereye mu Gihugu cy’u Bwongereza kuri Stade Emirates, aho Arsenal FC yari yakiriye Paris Saint-Germain, ikigugu cyo mu Bufaransa.
Uyu mukino watangiye amakipe yombi ari gushaka umuvuno wa nyawo wo gutsinda; ibyatumaga hatakara imipira myinshi hagati mu kibuga.
Icyakora , nk’Ikipe yari mu rugo, ku munota wa 19, Arsenal yafunguye amazamu ku gitego cyatsinzwe na Kai Havertz Lukas akoresheje umutwe ku mupira mwiza wari uzamuwe na Leandro Trossard, awutanga umunyezamu, Gianluigi Donnarumma.
Imaze gutsindwa igitego cya mbere ikipe ya Paris Saint-Germain, yakomeje kurushwa mu buryo bugaragara aho yari yaciriwe umurongo itemerewe kurenza umupira.
Ku munota wa 28, Paris Saint-Germain yabonye uburyo buremereye imbere y’izamu ku ishoti ryari rirekuwe na Nuno Mendes ari inyuma y’urubuga rw’amahina gusa birangira rikubise igiti cy’izamu.
Iyi kipe yo mu Murwa Mukuru, Paris w’u Bufaransa ibintu byayirangiriyeho ku munota wa 35, ubwo Ikipe ya Arsenal yatsindaga igitego cya kabiri kivuye kuri “Coup-Franc” yatewe na Bukayo Saka Ayoyinka Temitayo maze abakinnyi b’iyi kipe basimbuka umupira bajijisha umunyezamu Donnarumma birangira uruhukiye mu nshundura “nyegeri-nyegeri”.
Umukino warangiye Arsenal ibonye amanota atatu ya mbere muri Champions League y’uyu mwaka ku ntsinzi idasubirwaho imbere ya Paris Saint-Germain yari yahanishije Umufaransa, Ousmane Dembélé kudakina uyu mukino kubera imyutwarire idahwitse yagaragarije umutoza we, Luis Enrique Iglesias.
Mu yindi mikino ya UEFA Champions League yo ku munsi wa kabiri yakinwe, ikipe ya Manchester City yanyagiye Slovan Bratislava ibitego 4-0. Ni ibitego byatsinzwe na Ilkay Gundogan ku munota wa 8, Phil Foden Walter ku munota wa 15, Erling Haaland [wuzuzaga ibitego 42 mu mikino 41 y’iri rushanwa] ku munota wa 58, mbere y’uko James MacAtee ashyiramo agashyinguracumu ku munota wa 74.
Ku rundi ruhande, Borussia Dortmund kuri Stade Signal Iduna Park yatsinze Celtic ibitego 7-1. Karim Adeyemi yatsinzemo bitatu, Serhou Guirassy atsinda bibiri, mu gihe kapiteni Emre Can [kuri penaliti] na Félix Nmecha buri umwe yatsinze igitego kimwe baburizamo icy’Umuyapani Maeda wari watsindiye Celtic.
Inter[Nazionale] de Milan[o] kuri Stade Giuseppe Meazza yatsinze FK Crvena Zvezda ibitego 4-0, bya Mehdi Taremi watsinze bibiri, Lautaro Martinez na Hakan Calhanoglu bari bafunguye amazamu.
Bayer Leverkusen ibifashijwemo n’Umunya-Nigeria, Victor Okhor Boniface; yatsinze AC Milan igitego 1-0; naho PSV Eindhoven iwayo inanirwa kurinda igitego cya Jerdy Schouten birangira Sporting de Lisbon iyigomboye biba 1-1.
Ku rundi ruhande, FC Barcelona yanyagiye Young Boys ibitego 5-0 bya Robert Lewandowski [8’ & 51], Raphinha ku munota wa 34 ndetse, Inigo Martínez ku munota wa 37 na Ali Camara witsinze ku munota wa 81.
Imikino icyenda yabaye kuri uyu wa Kabiri yabonetsemo ibitego 32.
Mu gihe amakipe arimo Real Madrid na Bayern München akina kuri uyu wa Gatatu, Borussia Dortmund irayoboye n’amanota 6 [izigamye ibitego 9]. Aya manota iyanganya na Stade Brestios izigamye ibitego bitanu na Bayer Leverkusen. Manchester City iza ku mwanya wa kane n’amanota ane inganya na Inter Milan, Sparta Prague, Sporting CP, na Arsenal ya munani aho izigamye ibitego bibiri.
