Rayon Sports yatangaje ko yamaze gusinyisha rutahizamu w’Umunya-Nigeria, Sunday Oni Jimoh, wakiniraga Abia Warriors yo mu Cyiciro cya Mbere muri icyo gihugu.
Bubinyujije kuri Twitter, ubuyobozi bwa Rayon Sports bwagize buti “Rayon Sports yishimiye gutangaza ko yasinyishije umukinnyi w’Umunya-Nigeria wabigize umwuga, Sunday Oni Jimoh, wakiniye Ifeanyi Ubah na Abia Warriors. Yasinye imyaka ibiri mu ikipe yambara ubururu n’umweru. Ni we watsindiye Abia Warriors ibitego byinshi mu mwaka ushize w’imikino.”
Oni Jimoh yakiniye Abia Warriors kuva muri Gashyantare 2018, ni nyuma y’uko yari amaze gutandukana na FC Ifeanyi Ubah itaramwongereye amasezerano.
Uyu mukinnyi uvuka muri Leta ya Kogi, yabanje gukinira Heartland FC yo muri Oweri mbere yo kwerekeza muri Nnewi.
Urubuga rwa Flashscore rwerekana ko Oni Jimoh yatsinze ibitego bitandatu kuva ageze muri Abia Warriors birimo bitanu yatsinze mu mwaka ushize w’imikino wa 2021/2022 na kimwe yatsinze mu 2021. Kuva mu 2019, yatsinze ibitego 11 muri Shampiyona ya Nigeria.
Ni umukinnyi wa kabiri mushya usinyishijwe na Komite Nyobozi nshya ya Rayon Sports nyuma y’Umunya yo gusinyisha umutoza mushya Haringingo Francis wavuye muri SC Kiyovu.
Kuri ubu ikipe ya rayon sports ikomeje kwiyubaka ishaka uburyo yazatwara ibikombe umwaka utaha 2022-2023.
