Ibiciro by’amatike yo kureba umukino w’Ikipe y’Igihugu y’u Rwanda Amavubi n’iya Djibouti “Riverains de la Mer Rouge” mu gushaka itike yo kuzitabira Igikombe cya Afurika cy’Abakina imbere muri za Shampiyona z’iwabo, CHAN 2024; byashyizwe hanze, aho itike ihenze iri kugura miliyoni imwe y’Amafaranga y’u Rwanda, mu gihe iya make ari igihumbi, 1000 Rwf.
Ni umukino w’ijonjora ribanza uteganyijwe gukinwa ku Cyumweru taliki 27 Nzeri 2024 muri Stade Nationale, Amahoro i Remera mu Mujyi Kigali.
Aya matike agaragara ku ikoranabuhanga hifashishijwe kode ya *939# ugakurikiza amabwiriza, yerekana ko aya matike ari byiciro bitandatu [6], aho ihenze iri kugura miliyoni imwe y’Amafaranga y’u Rwanda, mu gihe iya make ari igihumbi, 1000 Rwf.
Icyiciro cya mbere ni imyanya y’ikirenga yiswe “SKYBox”, itike yaho yashyizwe ku giciro cya miliyoni imwe mu Mafaranga y’u Rwanda.
Ikindi cyiciro ni “Executive Box”, ikaba imyanya yungije iyi yo hejuru yo yashyizwe ku bihumbi 50 by’Amafaranga y’u Rwanda.
Ni mu gihe imyanya y’icyubahiro ya VVIP muri Stade Amahoro yashyizwe ku bihumbi 30, VIP biba ibihumbi 10 by’Amafaranga y’u Rwanda.
Ahicara abantu benshi mu gice cyo hasi hari kugura Amafaranga 1,000, kimwe n’imyanya yo ku gice cyo hejuru cya Stade Amahoro itike naho iri kugura igihumbi 1 cy’Amafaranga y’u Rwanda.
Hagati aho Ikipe y’Igihugu y’u Rwanda ikomeje imyitozo, aho kuri uyu wa Gatanu bakomeje imyitozo aho abakinnyi barimo Muhire Kevin, Omborenga Fitina, Gilbert Mugisha, Gilbert Byiringiro, Niyomugabo Claude, Niyigena Clement na Ruboneka Jean Bosco batakoze imyitozo mu gitondo kubera bari bakeneye kuruhuka kubera bamaze iminsi bakina imikino myinshi. Icyakora hagati aho iya saa Kumi n’Ebyiri yo bayigaragayemo.
Umukino ubanza wo mu ijonjora ry’ibanze uzakinwa tariki ya 27 Ukwakira, mbere y’uko Amavubi y’u Rwanda yakira “Riverains de la Mer Rouge” ya Djibouti tariki ya 31 Ugushyingo; imikino yombi ikazabera muri Stade Nationale Amahoro i Remera bitewe n’uko Djibouti iri mu bihugu 11 CAF yemeje ko nta Stade bifite zo kwakira imikino mpuzamahanga yo ku rwego rwa FIFA na CAF.
