Haringingo Francis wabaye umutoza wa Rayon Sports , yareze iyi kipe muri FIFA , nyuma y’uko yanze kumuhemba amafaranga imubereyemo angana na Miliyoni 9,5 Frw mu gihe yari umutoza w’ iyi kipe.
Ishyirahamwe rya Ruhago ku Isi FIFA ryatangaje ko iyi kipe ya Rayon itagomba kwandikisha abakinnyi nyuma y’ uko itarishyura ayo mafaranga angana na Miliyoni 9,5 frw, ibereyemo uwo mutoza.
Gusa kuri ubu Ubuyobozi bw’ iyi kipe bwatangaje ko bugiye gukemura iki kibazo cya Haringingo bitarenze kuri uyu wa Mbere.
Aya mafaranga uyu mutoza wahoze atoza Gikundiro arimo kurega iyi Kipe arimo miliyoni 6 Frw zihwanye n’ imishahara y’ amezi atatu, aya yiyongeraho agahimbazamusyi ka miliyoni 7 Frw yagombaga guhabwa kubera kwegukana Igikombe cy’ Amahoro cya 2023 nk’ uko amasezerano yabivugaga.
Ayo mafaranga yose hamwe angana na Miliyoni 13 Frw ,icyakora ku buyobozi bwa Uwayezu Jean Fidèle uyu mutoza yishyuwe miliyoni 3,5 Frw,bityo Gikundiro isabwa kwishyura miliyoni 9,5 Frw zisigaye.
Ikipe ya Murera ikomeje gushaka uko yongeramo abandi bakinnyi bashya kuko kuri uyu wa Mbere nk’ uko biteganwa ,iyi kipe iraza kwakira undi mukinnyi mushya ndetse we azasinya amasezerano atabanje gukora igeragezwa.
Kuri ubu ikipe ya Rayon Sports niyo iyoboye urutonde rwa Shampiyona kuko ifite amanota 36 irarusha iyikurikiye amanota 5.
