Intara ya Kivu y’Amajyaruguru iri mu burasirazuba bwa Repubulika iharanira Demokarasi ya Congo, ikomeje kuba usibaniro ry’imirwano hagati y’Ingabo za Leta ya Congo FARDC ndetse n’umutwe w’inyeshyamba wa M23. Nyuma y’uko M23 ifashe umugi wa Bunagana, iracyakomeje kurwana ishaka gufata utundi duce turimo teritwari ya Rutshuru. Harabarurwa byibuze abasivile 13 bahitanwe n’imirwano yo kuri uyu wa gatatu tariki 22 Kamena 2022.
Imirwano karundura yabyutse ihanganishije abasirikare ba FARDC na M23 mu duce two muri teritwari ya Rutshuru , ni imirwano bivugwa ko yumvikanyemo ibisasu biremereye. Ingabo za Repubulika iharanira Demokarasi ya Congo FARDC zivuga ko M23 ariyo yazishotoye ikazirasaho mu birindiro byazo ahitwa Shangi muri Rutshuru.
Amakuru akomeza avuga ko iyi mirwano yumvikanye mu duce dutandukanye twa Kivu y’Amajyaruguru aritwo M23 yashakaga kwigarurira turimo Shangi, Bikenke, na Ruvumu. Aha muri utu duce ngo hangiritse ibintu byinshi. FARDC ivuga ko yagerageje kwirukana aba barwanyi ba M23.
Ku rundi ruhande hari amakuru avuga ko utundi duce twegeranye n’utu twabereyemo imirwano kuri uyu wa gatatu two turi mu maboko y’abarwanyi ba M23. Uduce M23 bivugwa ko yamaze kwigarurira ni Buvumu, Buharo na Rutokara. Imirwano yo kuri uyu wa gatatu ikaba yahitanye abasivile bagera kuri 13, aba bose FARDC ivuga ko bishwe n’ibisasu bya M23 kuko inayishinja kuba ariyo yashoje imirwano yo kuri uyu wa gatatu.
