Ikipe ya Mukura Victory Sports et Loisirs ikomeje imyitozo yitegura umukino iteganya gukinamo na Rayon Sports kuri uyu wa Gatandatu taliki ya 10 Kanama 2024 mu birori byiswe “Mukura Season Launch”, nubwo FERWAFA yayimenyesheje ko bitazaba.
Kuri uyu wa Kabiri taliki 06 Kanama 2024, ni bwo Ishyirahamwe ry’Umupira w’Amaguru mu Rwanda, FERWAFA, ryamenyesheje Ikipe ya Mukura Victory Sports et Loisirs ko umukino wa gishuti wagombaga kuzayihuza na Rayon Sports ku munsi w’Iboriri byari bariswe ‘Mukura Season Launch’ taliki 10 Kanama 2024 utakibaye.
Impamvu zatanzwe z’uku gusubikwa k’umukino, ni uko FERWAFA ivuga ko udashobora kubera rimwe na ‘Super Coupe’ ya FERWAFA izahuza APR FC na Police FC ku wa Gatandatu, taliki ya 10 Kanama saa Cyenda zuzuye kuri Stade ya Kigali yitiriwe Pelé.
Nyamara ni ibirori Ikipe ya Mukura Victory Sports et Loisirs yari yateguye mu rwego rwo kwerekana abakinnyi izakoresha mu mwaka w’imikino wa 2024-2025, byagombaga gusozwa n’umukino wa gishuti na Rayon Sports.
Nubwo bimeze bityo, Mukura ikomeje imyiteguro
Iyi kipe yo mu karere ka Huye ikomeje imyitozo yitegura umukino iteganya gukinamo na Rayon Sports. Mukura ku mu goroba wo kuri uyu wa Kabiri kuri Stade Kamena, yakoze imyitozo yagaragayemo abakinnyi 25, barimo abashya, Irumva Justin, Alonso Bitchoka, Vincent Adams n’abandi.
Amakuru ava muri Mukura, yemeza ko bakiri mu biganiro byihariye n’Ishyirahamwe ry’Umupira w’Amaguru mu Rwanda [FERWAFA] ko bakwemererwa ibirori bafite kuri uyu wa Gatandatu ari na byo bateganya gukinamo na Rayon Sports.
Mukura iracyafite icyizere cy’uko ibi birori byayo byaba. Ni mu gihe KglNews yagerageje gutera icyumvirizo mu banyamupira mu Rwanda, aho yasanze iki cyemezo cyo kuburizamo ibi birori kitavugwaho rimwe; bamwe bemeza ko Mukura yimwe uburenganzira bwayo mu gihe abandi bemeza ko iyi kipe yatanze ubusabe itinze, bityo ko igomba kwirengera ingaruka kuko ititaye ku ngengabihe ya FERWAFA kandi ari yo iyifite nk’umunyamuryango wayo.