Umutwe wa AFC/M23 watangaje ko ukomeje gushyira imbaraga mu bikorwa byo guhangana n’icyorezo cya Ebola mu bice ugenzura mu Burasirazuba bwa Repubulika Iharanira Demokarasi ya Congo (RDC), nubwo muri ako karere hakomeje imirwano n’ibitero bivugwa ko bigira ingaruka ku baturage.

AFC/M23 ivuga ko ibikorwa bya gisirikare biri kubera mu bice bituwe cyane bikomeje guteza impungenge ku buzima bw’abaturage, cyane cyane mu gihe icyorezo cya Ebola kigihangayikishije abaturage bo muri Kivu y’Amajyaruguru.

Uyu mutwe uvuga ko ibitero n’imirwano bikomeje guteza ubuhunzi bw’abaturage benshi, ibintu bishobora gukomeza gukwirakwiza icyorezo cya Ebola kubera ingendo z’abantu bava mu bice bitandukanye no kuba hari abaturage badafite uburyo bworoshye bwo kubona serivisi z’ubuzima.

Mu itangazo ryasohowe n’ubuyobozi bwa AFC/M23, bwagaragaje ko ibikorwa byo gukumira no guhangana na Ebola bikomeje gukorwa binyuze mu matsinda yihariye ashinzwe ubuzima, agamije gukangurira abaturage kubahiriza amabwiriza yo kwirinda no gutahura hakiri kare abafite ibimenyetso by’iyo ndwara.

Mu muhango wo gutangiza gahunda yo gukaza ibikorwa byo kurwanya Ebola wabereye i Goma, Dr. Freddy Kaniki ushinzwe ibikorwa by’itsinda rishinzwe ibibazo by’ubuzima muri AFC/M23, yasabye abaturage gukomeza kugira amakenga no gukorana n’abaganga kugira ngo hirindwe ikwirakwira ry’icyo cyorezo.

Yagaragaje ko ubufatanye hagati y’abaturage, inzego z’ubuzima n’imiryango itanga ubufasha ari ingenzi mu gukomeza kurwanya Ebola muri ibi bihe by’umutekano muke.

AFC/M23 yavuze kandi ko ikomeje gukorana n’abafatanyabikorwa bo mu rwego rw’ubuzima mu gushimangira ibikorwa byo gukurikirana uko icyorezo gihagaze, kongera ubushobozi bw’ibigo nderabuzima no gufasha abaturage bo mu bice byugarijwe n’ingaruka z’intambara.

Mu bice bitandukanye byo muri Kivu y’Amajyaruguru, amakipe y’ubuzima akomeje gukora ubukangurambaga bwo kwigisha abaturage uburyo bwo kwirinda Ebola, harimo kwita ku isuku, kwihutira kujya kwa muganga igihe hagaragaye ibimenyetso ndetse no gutanga amakuru ku bakekwaho ubwandu.

Abashinzwe ubuzima muri ako karere bavuga ko gukomeza kwimurwa kw’abaturage, ikibazo cyo kubona ubuvuzi ndetse n’umutekano muke bishobora gukomeza gushyira abaturage mu kaga ko kwandura Ebola niba hatabayeho ubufatanye bw’inzego zitandukanye.

AFC/M23 yavuze ko izakomeza ibikorwa byo gufasha abaturage no gukomeza gahunda zo guhangana na Ebola, ivuga ko umutekano n’ubuzima bw’abaturage bikwiye gushyirwa imbere mu gihe ikibazo cy’umutekano gikomeje gufata indi ntera mu Burasirazuba bwa Congo.