Amakuru aturuka mu misozi miremire y’i Mulenge, mu ntara ya Kivu y’Amajyepfo, aravuga ko mu gicuku cyo kuri uyu wa Gatatu, ingabo z’u Burundi zifatanyije n’iza Repubulika Iharanira Demokarasi ya Congo (FARDC), zagabweho igitero gikomeye cyabateye igihunga, bamwe bahasiga ubuzima abandi barakomereka.
Nk’uko amakuru atangwa n’igitangazamakuru Minembwe Capital News abivuga, mu rukerera rwo kuri uyu wa 01 Mata 2026, mu duce twa Rubemba, Gakenke na Mikenke two muri Secteur ya Tombwe, ni ho hagabwe ibitero byifashishije indege zitagira abapilote (drone), bikibasira izo ngabo mu buryo butunguranye.
Umuturage wo muri ako gace waganiriye n’itangazamakuru yagize ati:“Guhera saa kenda z’urukerera kugeza saa kumi n’imwe z’igitondo, humvikanye urusaku rw’ibisasu bya drone bihitana abasirikare benshi, abandi barakomereka bikomeye,abasigaye bahise basubira inyuma.”
Nubwo hataramenyekana neza abagabye ibyo bitero, hari amakuru agaragaza ko bishoboka ko imwe mu drone z’izo ngabo yaba yarayobye, igatera ibisasu ku ngabo zayo hamwe n’iz’u Burundi,icyakora, nta ruhande na rumwe rurabyemeza ku mugaragaro.
Ibi bibaye mu gihe ku mugoroba wo ku wa 31 Werurwe 2026, indi drone bivugwa ko ari iya FARDC, yateye ibisasu mu matungo y’Abanyamulenge, ihitana inka zirenga 60, izindi nyinshi zirakomereka. Ibi byongeye kuzamura impungenge z’abaturage ku ikoreshwa ry’izi ndege mu bice bituwe, aho bishobora guteza ingaruka zikomeye ku buzima n’imibereho yabo.
Abasesenguzi mu by’umutekano bagaragaza ko ikoreshwa rya drone mu mirwano yo muri aka gace rikomeje gufata indi ntera, ariko rikaba rinatera impungenge ku buryo rishobora guteza impanuka no kwibasira abatari ku rugamba.
Aya makuru agaragaza uko umutekano ukomeje kuzamba i Mulenge no mu bice biyikikije, aho abaturage bakomeje kubaho mu bwoba, hagati y’imirwano idashira n’ibitero bitunguranye byibasira akarere kabo.
