Ingabo z’u Rwanda (RDF) na Polisi y’Igihugu byashyize ibuye ry’ifatizo ku nyubako y’ibyumba by’amashuri 10 bigiye kubakwa ku Ishuri ry’Imyuga n’Ubumenyingiro rya Kigese (Kigese TSS), riherereye mu Murenge wa Rugarika, Akarere ka Kamonyi. Ibi byumba byitezweho kugabanya ubucucike bwari busanzwe buri muri iki kigo.
Iki gikorwa cyatangijwe ku wa 9 Werurwe 2026, mu rwego rwa gahunda Ingabo na Polisi by’u Rwanda bifite yo gufasha abaturage mu bikorwa bigamije kuzamura imibereho myiza n’iterambere ryabo.
Uyu mushinga urimo kubakwa mu Kagari ka Masaka mu Murenge wa Rugarika, ukazatwara amafaranga agera kuri miliyoni 498 Frw. Biteganyijwe ko hazubakwamo ibyumba by’amashuri 10, icyumba cyihariye cy’abakobwa, laboratwari, inyubako z’ubuyobozi n’ubwiherero.
Guverineri w’Intara y’Amajyepfo, Kayitesi Alice, yashimye uruhare Ingabo na Polisi by’u Rwanda bigira mu gufasha abaturage mu bikorwa bibateza imbere.
Yagaragaje ko kubaka ibi byumba by’amashuri bizafasha gukemura ikibazo cy’ubucucike bwari bugaragara muri aka gace, cyane cyane ku Ishuri rya Kigese TSS ryari risanzwe rifite ibyumba bishaje ndetse n’abanyeshuri benshi.
Ati: “Iri shuri ryari rifite ubucucike bukabije ndetse n’ibyumba byinshi bishaje. Ni yo mpamvu twishimira ko ibi bikorwa bigiye gufasha gukemura iki kibazo. Mu izina ry’abaturage, turizeza ko tuzatanga umuganda mu bikorwa byo kubaka ibi byumba by’amashuri.”
Minisitiri w’Ingabo, Juvenal Marizamunda, yavuze ko ibikorwa nk’ibi bigamije kurushaho gushimangira ubufatanye n’abaturage, anagaragaza ko bijyana n’imikoranire n’ubwuzuzanye bisanzwe biranga Ingabo na Polisi by’u Rwanda.
Ati: “Ibi bikorwa bigaragaza imikoranire n’ubwuzuzanye bisanzwe biranga Ingabo na Polisi mu nshingano zabo za buri munsi zo kurinda igihugu n’umutekano w’abagituye.”
Yakomeje ashimangira ko impamvu Ingabo na Polisi bifatanya n’abaturage mu bikorwa by’iterambere ari uko umutekano n’iterambere ari ibintu bidatandukana.
Ati: “Twemera ko umutekano n’iterambere bijyana, kuko nta mutekano ushoboka mu gihe nta terambere ririho. Nanone biragorana kubungabunga umutekano mu gihugu kidakemura ibibazo by’imibereho myiza y’abaturage.”
Uwimpayidufashije, umwe mu babyeyi batuye muri aka gace, yavuze ko bishimiye iki gikorwa kuko kizafasha abana babo kubona aho bigira heza kandi haboroheye.
Ati: “Kongera ibyumba by’amashuri bizafasha abana bacu kwiga neza kandi bisanzuye, bityo bibafashe no gutsinda neza amasomo yabo.”
Mu ntangiriro za 2025, Minisiteri y’Uburezi (MINEDUC) yatangaje ko mu gihugu hose hakenewe ibyumba by’amashuri birenga ibihumbi 26, mu rwego rwo kugabanya ubucucike mu mashuri no gufasha abanyeshuri kubona umwanya uhagije wo kwiga.
