Rutahizamu usatira aciye mu mpande mu ikipe ya Rayon Sports, Joachiam Ojera arifuza kuguma muri iyi kipe bigendanye n’uko yagaragarijwe urugwiro n’abafana ndetse n’ubuyobozi bw’iyi kipe.
Tariki 27 Mutarama 2023, nibwo Joachiam Ojera yasinyiye Rayon Sports amasezerano y’amezi atandatu y’intizanyo guturuka mu ikipe ya Uganda Revenue Authority FC ‘URA FC’.
Amakuru yizewe KGLNEWS yamenye ni uko Joachiam Ojera nyuma yo kugera muri Rayon Sports agahita afatisha yamaze kubwira ubuyobozi bwa Rayon Sports ko yifuza kuyigumamo akayikinira undi mwaka w’imikino.
Ojera yahamagawe kenshi mu Ikipe y’Igihugu ya Uganda guhera mu 2018 ndetse yari muri Uganda Cranes yatwaye Igikombe cya CECAFA Challenge Cup 2019 n’iyakinnye CHAN 2020 yabereye muri Cameroun, itozwa n’Umunya-Ecosse Jonathan McKinstry.
Uyu mukinnyi w’imyaka 25 yabanje muri 11 ba Uganda banganyije n’Amavubi y’u Rwanda 0-0 muri iryo rushanwa kuri Stade de la Réunification tariki 18 Mutarama 2021.
Joackiam Ojera yari muri URA FC yakinnye imikino ya CAF Confederation Cup mu 2021 ikaza gusezererwa na Al Masry SC yo mu Misiri ku ijonjora ry’ibanze.
