Umunyezamu ukomoka mu gihugu cya Uganda Sebwato Nicholas wongereye amasezerano y’imyaka ibiri mu mwaka wa 2023 mu ikipe ya Mukura VS bikomeje kutamugendekera neza muri iyi kipe nubwo yari umuzamu mwiza mu myaka mike ishize.
Uyu muzamu yari yongereye amasezerano nyuma y’uko hari amakipe menshi yamwifuzaga ariko Mukura VS yemera ku muha asaga miliyoni 10 z’amafanga y’u Rwanda ndetse n’umushahara wa miliyoni imwe y’amafaranga y’u Rwanda.
Umwaka we w’imikino wa mbere kuva yongereye amasezerano yitwaye neza dore ko hari n’imikino yagiye afasha ikipe ya Mukura ayitsindiri igitego ibidasanzwe ku bazamu byari ku mukino Kiyovu Sports bari bakiriyemo Mukura kuri Kigali Pele Stadium atsinda igitego cyo kunganya mu minora y’anyuma y’umukino.
Ibi byiyongeraho gutoranwa mu babaga bahataniye ibihembo bya sevu y’ukwezi igihe ibi bihembo bitagitangwa byatangwaga buri kwezi mu mwaka ushize w’imikino wa 2023-2024.
Gusa ugiye kureba muri uyu mwaka w’imikino uyu muzamu ntago ari guhirwa n’urugendo rw’uyu mwaka w’imikino aho kuri ubu amaze kwinjizwa ibitego 14 mu mikino 13 gusa , wabara neza ugasanga byibuze buri mukino yinjizwa igitego.
Imwe mu mikino ya Sebwato Nicholas muri uyu mwaka w’imikino 2024-2025
APR FC VS Mukura , yinjijwe ibitego : 4
Rutsiro Vs Mukura VS, yinjijwe ibitego: 3
Gorilla VS Mukura VS, yinjijwe ibitego: 3
Uyu mukinnyi akaba na kapiteni w’ikipe ya Mukura Sebwato Nicholas ni umwe mu bazaga imbere ku rutonde ngaruka kwezi rw’abakinnyi 100 beza mu mupira w’u Rwanda rukorwa n’ikinyamakuru dailybox gusa kuri ubu naho yamanutse bigaragara aho ubu ari ku mwanya wa 43 kandi mu ntangiro z’uyu mwaka w’imikino yazaga mu bakinnyi 10 ba mbere. [RwandaBest].
Ibi kandi byiyongeraho ibitego ubona ko yinjizwa mu buryo budasobanutse neza, ubundi ibitego atajyaga apfa kwinjizwa mu buryo bworoshye mu myaka ishize y’imikino.
Ibi ariko ntiwareka kubihuza n’ibihe bitari byiza ikipe ya Mukura VS irimo byo kutabona intsinzi mu buryo buhoraho aho kuri ubu iyi kipe y’umutoza Afhamia Lofti iri ku mwanya wa 8 na amanota 17 n’umwenda w’ibitego 3.
Kuri ubu abafana b’iyi kipe barababaye cyane ndetse hari n’abatari bake bifuza ko umutoza wayo yasezererwa nubwo we ibyo atabikozwa nk’uko yagiye abigarukaho mu biganiro n’itangazamakuru.Abakunzi ba Mukura VS bamushinja gukinisha ikipe nabi , kwicaza abakinnyi batagakwiye kwicara ku ntebe y’abasimbura, ndetse no gukinisha abakinnyi mu myanya itari iyabo byose bigira ingaruka kuri ekipe yabo.
