Mu busanzwe hari ibintu umuntu ashobora gufata nk’ ibisanzwe nyamara bifite akamaro kanini ku buzima nko kunywa amazi by’ umwihariko mu gitondo, gusa uyu munsi hano kuri Kglnews twabateguriye ibyo ugomba kumenya ku bantu bakunda kunywa amazi buri gitondo

Kunywa amazi mu gitondo igikorwa cyoroshye, ariko gifite ingaruka nziza zitabarika ku mikorere y’umubiri, ku mitekerereze, ndetse no ku mibereho y’umuntu muri rusange.

Kunywa amazi mu gitondo byongera ingufu z’umubiri: Umubiri wawe ukoresha amazi mu bikorwa byinshi birimo gutembera kw’amaraso, gusohora imyanda, no gufasha ingingo zose gukora neza.Umunsi utangiye unyweye amazi uba utangiye neza, umubiri ukagira imbaraga zituma ushobora guhangana n’imirimo itandukanye, haba mu kazi, mu myigire cyangwa mu mirimo yo mu rugo.

Kunywa amazi mu gitondo bifasha igogora:Abantu benshi bahura n’ikibazo cy’impatwe cyangwa igogora rikorwa nabi, ahanini bitewe n’uko batanywa amazi ahagije. Amazi afasha igifu gutangira gukora neza. Ibi bituma igogora rikorwa neza, umuntu akirinda n’indwara zitandukanye zifata inyama zo mu nda.

Amazi afasha uruhu kugira isura nziza cyangwa guhehera: N’ubwo abantu benshi bakoresha  amafaranga menshi ku mavuta bisiga, ikintu cy’ibanze gifasha uruhu ni amazi.Amazi asohora imyanda iva mu mubiri, iyo imyanda isohotse neza, uruhu rugaragara neza, rugakira uduhere no gukanyarara byari biruriho, rukarushaho gusa neza. Ndetse kandi amazi atuma uruhu rutamukara kandi rugatinda gusaza.

Kunywa amazi mu gitondo bituma ubwonko bukora neza:Ubwonko bw’umuntu bugizwe ahanini n’amazi, bityo iyo amazi yabaye make mu mubiri bigira ingaruka ku mitekerereze n’ubushobozi bwo gufata ibintu mu mutwe.

Kunywa amazi kare bituma ubwonko bukanguka neza, bigafasha umuntu gutekereza neza, kwibuka no kwirinda umunaniro wo mu mutwe.

Kunywa amazi kare kandi bifasha umuntu ushaka kugabanya ibiro: Iyo unyweye amazi mbere yo kurya, bituma wumva uhaze vuba, ugafata ifunguro rito.

Ibi bigabanya amahirwe yo kurya ibirimo ibinure byinshi cyangwa isukari nyinshi. Amazi kandi atuma umubiri utangira gutwika ibinure kare kare, ibyo bigafasha mu rugendo rwo kugabanya ibiro.

Ikindi twavuga ni uko ibi bikorwa bihinduka umuco mwiza: Gutangirana umunsi n’igikorwa gifitiye umubiri akamaro bigaragaza ko umuntu yita ku buzima bwe. Iyo umuntu agira gahunda yo kunywa amazi buri gitondo, bituma n’indi myitwarire ye y’ubuzima igenda igira umurongo.

Gahunda yoroheje nk’iyo ishobora guhindura uburyo bwose umuntu abayeho.

Muri make, kunywa amazi mu gitondo ni imwe mu mico myiza abantu bari bakwiriye kugira nya mbere mu mibereho yabo. Si ibintu bisaba amafaranga cyangwa imbaraga nyinshi, ahubwo ni ukugira gahunda no kubyitaho.Aho gutangira umunsi unywa ibinyobwa birimo ikawa cyangwa soda, fata umwanya unywe igikombe cy’amazi. Ni kimwe mu bintu umubiri wawe uzagushimira.

NSHIMIYIMANA FRANCOIS/ KGLNEWS.COM