Mu Kinyarwanda bavuga ko “Ubyinana na mukeba (we) adahubya!” Iyi mvugo, mu igenekerezo, isobanuye ko umuntu muhanganiye ikintu cy’agaciro (urugero, umugabo mu gihe uri umugore) utaba ukwiye kumwizera. Uba ugomba kumwitondera ndetse byaba ngombwa ukamugendera kure kuko akenshi nta cyiza aba akwifuriza.
Ibi ntibitandukanye cyane no ku makipe aba ahanganiye ibikombe, abakinnyi, ubuhangange, abarizwa mu gace kamwe se, cyangwa ibindi bitandukanye bituma yigarurira amarangamutima y’abantu.
Uyu munsi, FC Barcelona imaze ibinyacumi byinshi ihanganye na Real Madrid muri Shampiyona ya Espagne no ku Isi yose, yarenze kuri iryo hangana maze iyishimira kuba yegukanye Igikombe cya Shampiyona ya Espagne, La Liga y’umwaka w’imikino wa 2023/2024.
Nyuma yo gufashwa na Brahim Díaz, Jude Bellingham na Joselu Matos kunyagira FC Cadiz ibitego 3-0, hanyuma Barcelona ikabatizwa na Girona basangiye icyerekezo ibitego 4-2, byahise bihesha Real Madrid Igikombe cya 36 cya Shampiyona.
Icyakora ibi ntibyari inkuru, iyo FC Barcelona itajya ku rubuga rwayo rwa X [rwahoze rwitwa Twitter] ngo yandike iti “FELICITATS AL REIAL MADRID PEL TÍTOL DE LLIGA”, bisobanuye mu Kinyarwanda ngo “MWISHYUKE CYANE REAL MADRID KU BWO KWEGUKANA IGIKOMBE CYA SHAMPIYONA”.
Ibi byakiriwe mu buryo butandukanye, aho abenshi babikurikije amagambo yemeza ko imyitwarire nk’iyi ituma umupira w’amaguru urushaho kuba mwiza, naho abandi bakavuga ko bidakwiye kuranga amakipe nk’aya y’amakeba.
Ibi kandi bizamurira kamere abihebeye iyi kipe y’i Catalonia yirengeje umwaka nta gikombe na kimwe itwaye, dore ko yatsinzwe na Real ku mukino wa nyuma wa ‘Spanish Super Cup’, ikandagazwa mu gikombe cy’igihugu (Copa del Rey), igasezerererwa mu rugo na Paris Saint Germain ya Kylian Mbappé muri Champions League, mbere gato yo kwihera mukeba igikombe cya Shampiyona itsindwa na Girona kuri uyu wa Gatandatu.
Si ubwa mbere FC Barcelona iteye Real Madrid icyotezo yatwaye ibikombe, kuko muri 2014 ubwo yatahukanaga Igikombe cya UEFA Champions yakuye i Lisbon muri Portugal, mu 2016 i Milan mu Butaliyani, mu 2017 i Cardiff muri Pays de Galles, ndetse no muri 2022 yegukaniye kuri Stade de France, hose Barcelona yagiye igaragaza ko yifatanyije na Real Madrid.
