Mu mpera z’iki cyumweru hategerejwe umukino wa makipe akomeye mu mupira w’amaguru w’u Rwanda aho APR FC izaba yakiriye Rayon Sports.
Kuri iki cyumweru tariki 29 Ukwakira APR FC irakira Rayon Sports kuri sitade ya Kigali Pele i Nyamirambo, uzaba ari umukino w’umunsi wa 9 wa shampiyona y’u Rwanda.
Mbere y’uko aya makipe akina APR FC n’iyo ihagaze neza ugereranyije na mukeba wayo Rayon Sports. Mu mukino 7 imaze gukina muri shampiyona y’uyu mwaka yatsinzemo 5 inganya 2, iri kumwanya wa kabiri ku rutonde rwa shampiyona n’amanota 17. Rayon Sports yo mu mikino 7 yatsinzemo 3 inganya 3 itsindwa 1, ifite amanota 12 ikaba ku mwanya wa 5 .
Ku kijyanye n’ubusatirizi APR FC n’iyo ihagaze neza aho imaze kwinjiza ibitego 11, mu gihe Rayon Sports imaze gutsinda ibitego 10. Mu bwugarizi Apr FC naho n’iyo imeze neza aho imaze kwinjizwa ibitego 4, mu gihe Rayon Sports imaze gutsindwa ibitego 6. APR FC ntiratsindwa umukino n’umwe kuva iyi shampiyona yatangira.
Mu mikino 5 iheruka guhuza aya makipe Rayon Sports niyo yitwaye neza, Yatsinzemo itatu, inganya 1. mu gihe APR FC yatsinze umukino 1. By’umwihariko Rayon Sports yatsinze APR FC imikino 3 iheruka.
Amakuru ava mu makipe yemeza ko abakinnyi bakomeye ku mpande zombi bo kwitegwa n’abafana bahari Kandi biteguye neza.
