Ikipe ya AS FAR Rabat yo mu gihugu cya Maroc ikinamo Umukinnyi w’Ikipe y’Igihugu y’u Rwanda, Imanishimwe Emmanuel “Mangwende” yakatishije itike y’umukino wa nyuma w’Igikombe cy’Igihugu nyuma y’iminsi mike itakaje Igikombe cya Shampiyona irushwa inota rimwe.
Kuri iki Cyumweru taliki 23 Kamena 2024, ni bwo mu gihugu cya Maroc hakinwaga imwe mu mikino isoza umwaka w’Imikino hakinwa imikino ya ½ y’Igikombe cy’Igihugu kizwi nka “Coupe du Trones” mu Bwami bwa Maroc.
Ni umukino Ikipe ya MAS Fès yari yakiriyemo AS FAR Rabat ya Mangwende kuri Stade Adrar [Stadium] iherereye mu mujyi wa Agadir.
Mu bakinnyi umutoza Nasradinne Nabi utoza FAR Rabat yahisemo gukoresha barimo na Imanishimwe Emmanuel Mangwende witwaye neza cyane muri uyu mukino warangiye batsinze ikipe ya MAS Fès ibitego 2-0.
Ni ibitego byabonetse ku munota wa 29 ubwo Y. Aguerdoum yazaga kwitsinda igitego mbere y’uko kabuhariwe w’Umunya-Maroc, Amine Zouhzouh aterekamo igitego cya kabiri ku munota wa 60, maze biba 2-0.
AS FAR Rabat ya Emmanuel Mangwende na bagenzi be izakina n’uza gutsinda hagati ya RAJA Athletic Club de Casablanca iherutse kubatwara Igikombe cya Shampiyona ibarusha inota rimwe itanatsinzwe umukino n’umwe ndetse na MC Oujda ziza kwisobanura uyu munsi.