Ikipe y’Ingabo z’Igihugu, APR FC yageze mu gihugu cya Misiri aho igiye gukina na FC Pyramids mu mukino wo kwishyura mu ijonjora rya kabiri rya CAF Champions League uteganyijwe ku wa Gatandatu, tariki ya 21 Nzeri 2024, nyuma y’aho umukino ubanza amakipe yombi aguye miswi igitego 1-1.
Mu gitondo cyo kuri uyu wa Gatatu, ni bwo APR FC yageze i Caïro mu Misiri nyuma y’uko mu masaha ya saa Cyenda zo kuri uyu wa Kabiri tariki 17 Nzeri 2024, abagize iyi kipe bahagurutse ku Kibuga cy’Indege cya Kigali kiri i Kanombe.
Mu rugendo rwayo, iyi kipe yanyuze i Addis Ababa muri Ethiopie n’i Dubai muri Leta Ziyunze z’Abarabu mbere yo kugera i Caïro mu murwa mukuru wa Misiri aho umukino nyirizina uzabera.
Nyuma y’uko Fiston Kalala Mayele yanze ko APR FC isoza umukino ifite impamba ubwo yishyuraga igitego umukino ukarangira ari igitego 1-1, APR FC irasabwa nibura kwinjiza igitego kugira ngo ibe yakomeza. Ishobora gutsinda 1-0, 2-0, 2-1… cyangwa no kunganya ibitego biri hejuru ya 2 kubera ko CAF igiha agaciro igitego cyatsindiwe hanze.
Uyu mukino wo kwishyura uteganyijwe ku wa Gatandatu, tariki ya 21 Nzeri 2024 mu murwa mukuru Cairo wa Misiri, aho ikipe izatsinda uyu mukino w’Ijonjora rya Kabiri azahita yinjira mu matsinda ya CAF Champions League ya 2024/2025.