Abami ba “The Basketball Africa League, BAL” ya 2023, Al Ahly yo mu gihugu cya Misiri basezerewe mu irushanwa badatsinze umukino n’umwe, nyuma yo gutsindwa na Al Ahly yo muri Libie amanota 77-86 ku Cyumweru taliki 26 Gicurasi 2024.
Ni nyuma y’umwaka umwe wuzuye neza Al Ahly yegukanye irushanwa rya BAL 2023 nyuma yo gutsinda AS Douanes yo muri Sénégal amanota 80-65, ku wa Gatandatu, taliki 27 Gicurasi 2023 muri BK Arena.
Iyi kipe yo mu Misiri yari ibaye ikipe ya gatatu itwaye igikombe, ariko mu mwaka ukurikiyeho ikagayika mu irushanwa.
Taliki 30 Gicurasi 2021, ikipe ya Zamalek na yo ibarizwa mu gihugu cya Misiri, yatwaye Igikombe cya mbere mu mateka ya Shampiyona Nyafurika ya Basketball [BAL] itsindiye US Monastir yo muri Tunisie ku mukino wa nyuma amanota 76 kuri 63.
Nyuma y’aho, uretse kwegukana umwanya wa gatatu mu irushanwa rya BAL 2022 itsinze FAP yo muri Cameroun amanota 97-74, Zamalek ntiyongeye kwitabira iri rushanwa kugera na n’ubu.
Ibi ntibitandukanye cyane n’ibyabaye kuri US Monastir yo muri Tunisie yaraye inasezerewe muri ¼ na Rivers Hoopers yo muri Nigeria nyuma yo kuyitsinda amanota 92-88.
Imyaka ibiri iruzuye neza, kuko ku italiki nk’iy’uyu munsi mu 2022, U(nion) S(portive) Monastir(ienne) ni yo yari yegukanye BAL 2022 itsinze Petro de Luanda yo muri Angola amanota 83-72.
Nyuma y’aho muri BAL ya 2023, iyi kipe yo muri Tunisie ntiyabonye itike y’imikino ya nyuma “finals” muri BK Arena.
N’ubwo bimeze bityo ariko wavuga ko US Monastir ari yo yagerageje kwitwara neza kuko imaze gukina imikino ibiri ya nyuma; ku nshuro ya mbere muri 2021 itsindwa na Zamalek ndetse no muri 2022 yegukana igikombe.
Muri rusange, iyo witegereje mu mpamvu zishobora gutuma amakipe adahozaho muri BAL, usanga zikubiye mu byiciro bine by’ingenzi.
Impamvu ya mbere, hari ukuba nta kipe isinyisha abakinnyi amasezerano y’igihe kirekire. Biragoye kubona umukinnyi asinyira ikipe imyaka ibiri cyagwa hejuru yayo mu ikipe runaka.
Urugero rwa hafi, ni Umunyamerika, Marcus Christopher Crawford ufite agahigo ko gutsinda amanota menshi kuva muri 2021 BAL yatangira gukinwa (amanota 341). Uyu wigeze no gukinira Patriots BBC yo mu Rwanda, mu myaka itatu ishize amaze gukinira amakipe 12.
Muri 2021 yakiniye Club Africain, Ezzahra Sports, na US Monastir. Muri 2022 yakiniye amakipe ya SLAC, Al Wahda Damascus ndetse na BBC Patriots y’i Kigali. Muri 2023 yakiniye AS Douanes, Beirut Club, AS Salé, Al Ahly Benghazi, na Al Ittihad Alexandria; mu gihe muri uyu mwaka yakiniye ikipe imwe ari na yo arimo uyu munsi ya US Monastir.
Indi mpamvu itera ukudahozaho muri BAL, ni ugukoresha abakinnyi wakwita “abanyabiraka”. Ni ba bakinnyi baza baje gukina BAL gusa yarangira bakagenda.
Usanga akenshi baba baturutse muri za Shampiyona zikomeye zirimo na NBA ku buryo nta kipe yabasha kwishyura imishahara yabo n’ibindi byose bimugendaho nk’umukinnyi ukomeye.
Impamvu ya gatatu ituma nta kipe ivuna umuheha umwe ngo yongezwe ibiri muri BAL, ni urwego rw’ihangana ndetse n’ihindagurika ry’amakipe.
Uretse ikipe ya Petro Athletique de Luanda BBC yitabiriye imikino ya nyuma y’iri rushanwa inshuro zose ryakinwe, andi makipe yose arahindagurika. Ibi biterwa n’urwego rw’amarushanwa y’imbere mu bihugu aho usanga nta kipe yatwara ibikombe bibiri bikurikirana.
Urugero mu myaka 4, u Rwanda rumaze guhagararirwa n’amakipe atatu atandukanye, ari yo Patriots [1], R(wanda) E(nergy) G(roup) [2] ndetse na A(rmée) P(atriotique) R(wandaise) [1] yasezerewe itabashije gukina imikino ya nyuma muri BK Arena.
Uretse izi mpamvu zavuzwe haruguru, impamvu z’imyiteguro na zo zigira uruhare rukomeye mu kugena imyitwarire y’ikipe muri BAL.
Dore isano riri hagati aho. Ikipe ya Al Ahly yo mu Misiri, imaze kubona ko umutoza Agustin Julbe Bosch yatwaranye igikombe na Zamalek basangiye igihugu, yahise imusinyisha neza cyane, maze ahita ayihesha BAL ya 2023. Kuva ubwo kandi nta gikombe Zamalek yongeye gutwara imbere mu gihugu; ibituma Al Ahly ari yo yasohokeye Misiri muri iyi mwaka ibiri ishize.
Mu by’ukuri, kuko usanga amakipe menshi yakemuye ibisabwa byose ngo yitware neza n’ubwo atari ku rugero rungana, ariko ikipe yahiriwe n’abakinnyi “recruitments”, byanze bikunze iraza ikegukana irushanwa.
