Mu ijoro ryo ku cyumweru rishyira ku wa mbere, tariki ya 31 Werurwe, umujyi wa Goma waraye mu mwijima w’urusaku rw’amasasu, cyane cyane mu duce twinshi twa komini ya Karisimbi. Nyuma y’iryo joro ry’ubwoba, mu gitondo cyakurikiyeho, habonetse imirambo itatu y’abantu bishwe barashwe.
Ubwicanyi bwabereye he?
Ubwicanyi bwa mbere bwabereye mu gace ka Kasindi, muri Katoyi, ahagana saa munani z’ijoro. Umugore wari usanzwe akora ubucuruzi bw’akabari n’ifunguro rusange yarashwe n’abantu bataramenyekana. Uyu mugore yari azwiho guteka ibiryo bikunzwe birimo ubugari, isombe n’ikinono, kandi yari akunzwe n’abaturage bo muri ako gace.
Nk’uko bitangazwa na Radio Okapi, uyu mugore yasize umuryango mu gahinda, mu gihe abamwishe batari bwamenyekane.
Undi murambo wagaragaye mu gace ka Mabanga-Sud, aho umuntu yarashwe urufaya rw’amasasu. Abaturage baho bavuga ko inyeshyamba za M23 zishobora kuba zifite aho zihuriye n’ubu bwicanyi, kuko uwo wishwe bivugwa ko yari umunyabyaha wamaganwaga n’abaturage.
Ikindi gikorwa kimeze nk’icyo cyagaragaye mu majyaruguru ya Goma, ku nkombe za Nyiragongo, aho nabwo habonetse undi murambo w’uwishwe arashwe.
Urusaku rw’amasasu rwakangaranyije abaturage
Mu duce twa Kasika, Mapendo, Katindo, Majengo, na Mikeno, abatuye aho bavuga ko bumvise urusaku rw’amasasu kuva mu ijoro kugeza mu gitondo cya kare. Nubwo ibi bitero byateye ubwoba abaturage, inzego z’umutekano ntiziratangaza uwaba abiri inyuma cyangwa icyaba cyabiteye.
Ibi bitero byateye impungenge nyinshi, cyane ko Goma isanzwe ibamo umutekano muke uterwa n’intambara z’inyeshyamba. Abaturage barasaba ubuyobozi gushyira imbaraga mu gukumira ubwicanyi bukomeje kwiyongera.
