Ikigugu cyo muri Espagne, Real Madrid n’uruganda rw’Abadage, Adidas bashyize hanze umwambaro iyi kipe izakoresha mu mwaka utaha w’imikino wa 2024/2025 mu gikorwa cyabaye kuri uyu wa Kabiri taliki 5 Kamena 2024.
Ni umwambaro nk’ibisanzwe wiganjemo ibara ry’umweru iyi kipe isanzwe yambara ndetse n’amabara make y’umukara agaragaza yanditse amazina na numéro mu mugongo ndetse n’ibirango byose by’abaterankunga bo bagaragara ku mwambaro wa Real Madrid.
Uyu mwambaro, hamwe n’igishushanyo cyawo bifitanye isano rya hafi n’imyabaro y’amateka ya Real Madrid yagiye yambara mu bihe bitandukanye kuva mu ishingwa ryayo.Ni umwambaro ukozwe mu bikoresho bigezweho kandi ugaragaramo ikoranabuhanga rya “HEAT.RDY”, riringaniza umwuka kugira ngo abakinnyi bajye babona ubukonje bukenerwa mu gihe bari mu kibuga.
Uyu kandi uzajya wambarwa n’amakipe yose arimo Real Madrid nkuru iri mu mpumeko yo kwegukana UEFA Champions League no gusinyisha Kylian Mbappé, amakipe y’ibyiciro by’abakiri bato ndetse n’ay’abagore.
