Ikipe ya Rayon Sports FC yasinyishije umukinnyi mpuzamahanga w’Umurundi, Ndikuriyo Patient wari usanzwe ari umunyezamu w’Ikipe y’Amagaju FC, kuri uyu wa Kabiri taliki 2 Nyakanga 2024.
Rayon Sports yumvikanye n’uyu munyezamu kumusinyisha amasezerano y’imyaka ibiri. Byasabye ko igura umwaka umwe w’amasezerano yari asigaje muri iyi kipe yo mu karere ka Nyamagabe.
Ndikuriyo Patient w’Imyaka 25 y’amavuko, mu mwaka we wa mbere muri Shampiyona y’Icyiciro cya Mbere mu Rwanda, yigaragaje nk’umwe mu beza bari bahari nhyuma y’uko yafashije Amagaju yari azamutse mu Cyiciro cya Mbere kurangiriza ku mwanya wa munani [8].
Ni Ndikuriyo wari wahembwe nk’umunyezamu mwiza wa Shampiyona yIcyiciro cya Mbere mu Burundi mu mwaka w’imikino wa 2022/2023, amaze gufasha ikipe yakiniraga ya Bumamuru kwegukana igikombe cyo muri iki gihugu.
Uyu munyezamu yari amaze umwaka umwe mu Amagaju, kuko yayisinyiye muri 2023 ikimara kugaruka mu cyiciro cya Mbere. Agiye muri Rayon Sports iherutse kongerera amasezerano Umunyezamu ukomoka muri Senegal, Khadim Ndiaye, akaba ari we bagiye guhanganira umwanya wo kubanza mu kibuga.
