Ikipe y’Igipolisi cy’Igihugu, Police FC yamaze kumvikana n’Umunya-Ouganda, Allan Kateregga wakiniraga ikipe ya FC Saint-Éloi Lupopo ikina Shampiyona y’Ikiciro cya Mbere muri Repubulika Iharanira Demokarasi ya Congo.
Amakuru yizewe KglNews ifite neza, ni uko Allan Kateregga yasinyiye Police FC amasezereno y’imyaka ibiri [2] kuri uyu wa Gatatu taliki 3 Nyakanga 2024.
Uyu Munya-Ouganda w’imyaka 30 y’amavuko asanzwe afite izina riremereye kuko yakiniye amakipe menshi atandukanye by’umwihariko ayo mu karere ka Afurika y’u Burasirazuba n’iyo Hagati.
Allan Kateregga ufite uburebure bwa metero 1.75 asanzwe akina hagati mu kibuga ariko afasha ba rutahizamu; umwanya usanzwe ukinaho abarimo Hakizimana Muhadjiri uherutse kongererwa amasezerano y’imyaka ibiri akinira Police FC.
Allan Kateregga yakiniye amakipe atandukanye, aho muri 2012–2013 yakiniye Victoria University, 2013–2014 anyura muri Tusker, 2014–2015 akinira BUL, 2015–2017 ajya muri FC Leopards, mbere y’uko muri 2017–2018 ajya muri KCCA FC. Muri 2018–2019 yabaye muri Cape Town City mbere yo gutizwa mu ikipe Maritzburg United, muri 2019–2021 yerekeza muri Erbil SC, ahava yerekeza muri FC Saint-Éloi Lupopo ari na yo yavuyemo aza muri Police FC.
Uyu mukinnyi ukinira Ikipe y’Igihugu ya Ouganda aje gufatanya n’abandi nka Richard Kilongozi Bazombwa, na Patience Niyongira baherutse kwinjira muri Police FC bahasanga abandi iyi kipe yari yasinyishije mbere.
Ni Police FC izahagararira u Rwanda mu mikino Nyafurika ya CAF Confederations Cup nyuma yo kwegukana Igikombe cy’Amahoro.
