Ikipe ya Rayon Sports yamaze kumvikana na rutahizamu Jean Marc Makusu Mundele ukomoka muri Repubulika Iharanira Demokarasi ya Congo.
Hashize ukwezi impande zombi ziri mu biganiro, ibiganiro bikaba byari byarasubitswe bitewe n’uko uyu rutahizamu yari ari mu Ikipe y’Igihugu ya Congo Kinshasa mu irushanwa rya CHAN 2023.
Nyuma y’uko Congo Kinshasa isezerewe itarenze amatsinda, Jean Marc Makusu Mundele yahise asubukura ibiganiro na Rayon bakaba bamaze kumvikana kuyisinyira amasezerano y’amezi atandatu.
Amakuru yizewe KGLNEWS yamenye ni uko Jean Marc Makusu Mundele azajya ahembwa miliyoni eshatu buri kwezi, nta gihindutse akazagera mu Rwanda tariki 26 Mutarama 2023.
Jean Marc Makusu Mundele yavutse tariki 27 Werurwe 1992,mu mwaka w’i 2014 yakiniye ikipe ya Standard de Liège mu Bubiligi ariko mu myaka ibiri yayimazemo yamutije mu makipe abiri atandandukanye. Hagati y’umwaka wa 2015-2016 yakiniye ikipe ya DCMP y’iwabo n’ubundi maze 2017 kugeza 2018 akinira Wadi Degla Sporting Club yo mu Misiri mbere ahita asubira muri AS Vita Club .
Mu mwaka wa 2020 yagiye mu ikipe ya Orlando Pirates yo muri Afurika y’Epfo nk’intizanyo ariko naho ntabwo yahatinze kuko mu 2021 yahise asubira muri DCMP mu gihe kugeza ubu yari ari gukina muri Ste Eloi Lupopo ariko tariki ya Mutarama 2023 yatangaje ko ku bwumvikane bw’impande zombi basheshe amasezerano yabo n’uyu rutahizamu.
Kuva mu mwaka wa 2014 Jean Marc Makusu Mundele yahamagawe bwa mbere mu ikipe y’igihugu ya RDC yakiniye mu bihe bitandukanye.
