Mu mpera ziki cyumweru shampiyona y’ikiciro cya mbere mu mupira w’amaguru mu Rwanda irakomeza hakinwa imikino y’umunsi wa 5.
Umwe mu mikino ikomeye itegerejwe ni umukino uzahuza ikipe ya Mukura Victory Sports et Loisirs izaba yasuye ikipe ya Musanze FC kuri uyu wa Gatandatu tariki ya 30 Nzeri kuri sitade Ubworoherane, i Saa 15h00.
Mbere y’uyu mukino ikipe ya Mukura Victory Sports yateguje abanya Musanze ibibutsa ko isanzwe ibatsinda. Ku mbuga nkoranyambaga zayo Mukura yanditse iti: Bakunzi ba Mukura Victory sports muze tujye i Musanze. Tariki ya 5/11/2022 byari Ibitego 3, Tariki ya 27/05/2023 byari Ibitego 4, none 30/09/2023 bizaba ari bingahe?.
Mu mikino 10 iheruka kubahuza ikipe ya Mukura Victory Sports yatsinze imikino 5 Musanze FC itsinda 3 banganya 2. Muri uyu mwaka w’imikino Musanze FC ntiratakaza umukino n’umwe muri itatu imaze gukina, naho Mukura mu mikino 4 imaze gukina yatsinzemo umwe itsindirwa undi inganya imikino 2.
Musanze niyo kipe imaze kwinjiza Ibitego byinshi bigera kuri birindwi muri shampiyona y’u Rwanda mu gihe Mukura imaze kwinjiza ibitego 3 yo ikinjizwa 5.
Kurutonde rwa shampiyona ikipe ya Musanze iri kumwanya wa mbere n’amanota 9/9, Mukura Victory Sports iri kumwanya wa 7 n’amanota 5.
Musanze FC nitsinda izakomeza kuyobora urutonde rwagateganyo rwa shampiyona. Mu gihe Mukura Victory Sports aricyo gihe cyo kwiyunga n’abafana bayo ariko inasha uko yakwegera imbere kurutonde.
