Imvune y’Umunyezamu akaba na kapiteni wa FC Barcelona, Umudage, Marc André ter Stegen yatumye umunyabigwi w’iyi kipe, Claudio Andrés Bravo Muñoz yiyemeza gusubira mu biti by’izamu mu gihe yakwiyambazwa i Katalunya.
Kuri iki Cyumweru tariki 22 Nzeri 2024, mu mukino w’umunsi wa gatandatu wa Shampiyona ya Espagne; Villarreal FC yari yakiriye Barcelona batazira “La Blaugrana”, maze muri uyu mukino Marc André ter Stegen asama umupira mu birere, mu kumanuka akandagira nabi yisekura hasi.
Yahise asohorwa mu kibuga, icyakora Barça icyura amanota yose imbumbe nyuma yo gutsinda ibitego bitanu byinjijwe na Robert Lewandowski [2], Pablo Torre, na Raphinha [2]; ibyatumye iyi kipe y’i Catalonia yuzuza intsinzi 6/6, amanota 18/18.
Icyakora nyuma y’uyu mukino Barcelona yagize iti “Ibizamini byakozwe byerekanye ko Marc André ter Stegen yavunitse burundu mu ivi [tendon rotulien] ry’ibumoso”. Byari mbere y’uko byemezwa ko azamara amezi ari hagati y’arindwi n’umunani atagaragara mu kibuga.
Claudio Andrés Bravo Muñoz giye kuva mu kiruhuko cy’izabukuru za ruhago
Umunya-Espagne wari wungirije ter Stegen, Iñaki Peña w’imyaka 25 y’amavuko byagaragajwe ko ateze neza byo kurindira La Blaugrana nubwo afite inararibonye yavanye muri Galatasaray muri 2022, dore ko amaze gukina imikino itarenze 25 muri iyi kipe kuva yakwambara umwambaro wayo muri 2019.
Ni mu gihe kandi Umunya-Chile, Claudio Bravo yatangarije WinWin na Footmercato ati “Barcelona iramutse inyiyambaje, nditeguye”.
Uyu mugabo w’imyaka 41 y’amavuko yari aherutse gutangaza ko asezeye burundu ku gukina ruhago nk’uwabigize umwuga tariki 27 Kanama 2024.
Ni Bravo watwaranye na Barcelona ibikombe bibiri bya Shampiyona ya Espagne, La Liga [2014–15, 2015–16]; Ibikombe 2 by’Umwami, Copa del Rey [2014–15, 2015–16]; Icya Supercopa de España muri 2016, icya UEFA Champions League muri 2014–15; UEFA Super Cup ya 2015 ndetse n’Igikombe cy’Isi cy’Amakipe, FIFA Club World Cup cya 2015.
