Ikipe ya Mouloudia Club d’Alger [MC Alger], ikina Shampiyona y’Icyiciro cya Mbere muri Algerie yatangiye gukora imyitozo ikakaye isanzwe imenyerewe cyane mu ngando za gisirikare, mu rwego rwo kwitegura neza imikino ya CAF Champions League iyi kipe ifitiye itike.
Ni imyitozo itari gukorerwa mu kibuga gisanzwe, ahubwo bari kuyikorera ahantu hatandukanye hagoranye nko mu bishanga by’isayo ridasanzwe, amashyamba arimo amahwa; aho bakorera ibirimo guterura ingiga z’ibiti n’ibindi.
Iyi kipe ibitse ibikombe 8 bya Shampiyona ya Algerie ubariyemo n’iy’uyu mwaka, iri kwitegura umukino w’Ijonjora rya mbere rya CAF Champions League, aho igomba guhura n’ikipe ya Watanga ibitse Igikombe cya Shampiyona ya Liberie.
Ni umukino uteganyijwe taliki ya 18 Kanama 2024, mu gihe uwo kwishyura ugomba kuzaba taliki 23 Kanama 2024. Bizaba ari mbere gato yo gutangira imikino ya Shampiyona.
