Ihuriro rya AFC/M23 ryatangaje ko abarwanyi baryo batavuye muri Walikare, nk’uko byari byatangajwe mbere, bitewe n’ibitero by’uruhande bahanganye rwa FARDC n’abambari bayo. Ibi byatangajwe n’Umuvugizi wa AFC/M23, Lawrence Kanyuka, kuri uyu wa Mbere tariki 24 Werurwe 2025, mu itangazo ryashizwe hanze.
Nk’uko byavuzwe muri iri tangazo, hari hatangajwe icyemezo cyo kurekura umujyi wa Walikare ku wa 22 Werurwe 2025, ariko ibyabaye ku Cyumweru tariki 23 Werurwe 2025 byahinduye isura y’icyo cyemezo. Umuvugizi wa AFC/M23 yavuze ko FARDC n’abarwanyi bishyize hamwe, banze guhagarika ibitero bya drone muri Walikare, bituma abarwanyi ba M23 batabasha kuva muri aka gace.
Kanyuka yavuze ko ibi bitero by’umwanzi byatumye habaho idindira rikomeye mu ishyirwa mu bikorwa ry’icyemezo cyo guhagarika imirwano no gushaka amahoro, ibi bikaba ari imbogamizi zikomeye mu nzira y’amahoro yifuza kugerwaho.
Mu gihe cyose iri Huriro ryari ryatangaje ko ryagombaga kurekura Walikare, icyemezo cyakiriwe neza na Guverinoma y’u Rwanda. Mu itangazo ryashyizwe hanze n’Ibiro by’Umuvugizi wa Guverinoma y’u Rwanda, byavuzwe ko u Rwanda rwishimiye igikorwa cya M23, mu rwego rwo gushyigikira gahunda y’ibiganiro byo kugarura amahoro.
Ubuyobozi bw’Ingabo za Repubulika Iharanira Demokarasi ya Congo (FARDC) na bwo bwashimiye iki cyemezo cya M23, kandi bwatangaje ko bwahagaritse ibitero kuri M23. Ibi byabaye nyuma y’ibiganiro hagati ya Perezida Paul Kagame w’u Rwanda na Perezida Felix Tshisekedi wa DRC, biganirwaga muri Qatar, aho abayobozi b’ibi bihugu bagiranye ibiganiro byatanzwe n’Umuyobozi w’Ikirenga w’iki gihugu, Sheikh Tamim bin Hamad Al Thani.
Guverinoma ya Qatar nayo yashimiye ibyatangajwe n’ibihugu byombi, yongeraho ko ibi biganisha ku mahoro arambye mu karere. Iyi ntambwe ikaba ikomeje kugaragaza ubushake bwo kubaka amahoro no kugabanya umwuka w’intambara mu karere.
KGLNEWS.COM
