Ikipe y’Igihugu ya Columbia yatsinze iya Uruguay igitego 1-0 yerekeza ku mukino wa nyuma w’Igikombe gihuguza Amakipe y’Ibihugu byo ku Mugabane wa Amerika, Copa América ya 2024 ikomeje kubera muri Leta Zunze Ubumwe za Amerika.
Mu rukerera rwo kuri uyu wa Kane, ni bwo hakomezaga imikino ya ½ cy’irangiza muri Copa América aho Ikipe y’Igihugu ya Columbia yari yakiriye iya Uruguay itozwa n’Umukambwe, Marcelo Bielsa.
Igitego cya Jefferson Lerma ku mupira yahawe na Kapiteni udashirayo, James Rodríguez, ni cyo cyakoze ikinyuranyo mu mukino ku munota wa 39 w’Umukino.
Ikipe y’Igihugu ya Uruguay yabonaga uburyo bwinshi imbere y’izamu binyuze muri Darwin Núnez, Federico Santiago Valverde DiPetta na Luis Súarez, ntiyabashije kububyaza umusaruro imbere ya Columbia yakinnye igice cya kabiri ari 10 nyuma y’ikarita itukura yahawe myugariro Daniel Muñoz mu mpera z’igice cya mbere.
Muri uyu mukino, James Rodriguez yongeye kurikoroza atanga umupira wavuyemo igitego imbere y’abafana ibihumbi 70, uba umupira wa gatandatu [6] atanze muri iri rushanwa rya 2024.
Uyu mukino waranzwe n’imvururu dore ko nyuma y’uko urangiye Darwin Núñez yashyamiranye n’abafana ba Columbia, ushobora kuba ari na wo mukino wa nyuma wa rutahizamu, Luis Suárez muri Uruguay.
Imyaka 23 irashize Columbia itwaye Copa América. Mu rukerera rwo kuwa Mbere taliki 15 Nyakanga 2024, Abanya-Columbia bazacakirana na Argentine ya Lionel Messi mu mujyi wa Miami bashaka icya kabiri kikurikiranya. Argentine you yasezereye Canada mu rukerera rwo ku wa Gatatu taliki 10 Nyakanga 2024.
