Chelsea FC yatangaje ko yatandudanye n’uwari umutoza wayo Mukuru, Mauricio Pochettino ku bwumvikane bw’impande zombi, nyuma y’umwaka umwe yari amaze muri iyi kipe yo mu murwa Mukuru, Londres.
Ni itangazo yanyujije ku mbuga ngurukanabumenyi zayo ku mugoroba wo kuri uyu wa Kabiri taliki 21 Gicurasi 2024.
Abayobozi b’ibikorwa by’imikino ‘Sporting Directors’ muri iyi kipe: Laurence Stewart na Paul Winstanley bagize bati “Mu cyimbo cya buri wese muri Chelsea, turashaka gushimira Mauricio [Pochettino] kuri serivisi yatugejejeho muri uyu mwaka w’imikino. Ahawe ikaze kandi kuri Stamford Bridge [Stade ya Chelsea] igihe icyo ari cyo cyose hashakwa ko agaruka, ndetse tumwifurije amahirwe masa mu mwuga we w’ubutoza mu gihe kiri imbere.”
Uyu mugabo ukomoka muri Argentina, Mauricio Pochettino we yagize ati “Mwarakoze ubuyobozi bwa Chelsea ku bwo kumpa amahirwe yo kwandikwa mu mateka y’iyi kipe. Ikipe ubu noneho iri mu mujyo mwiza ugana, ndetse yiteguye neza “Premier League” ndetse no ku ruhando rw’u Burayi mu myaka iri imbere.
Si Mauricio Pochettino agiye wenyine, kuko yajyanye n’abo bafatanyaga mu gutoza Chelsea, ari bo Jesus Perez, Miguel d’Agostino, Toni Jimenez ndetse na bazina we Sebastiano Pochettino.
Pochettino mu mwaka umwe yari atoje Chelsea FC ayisize ku mwanya wa 6 uyemerera gukina Europa League, nyuma yo gukina imikino 51, agakuramo Intsinzi 27, Kunganya 1, no Gutsindwa 14.
Pochettino kandi yagejeje Chelsea ku mukino wa nyuma wa Carabao Cup atsindirwayo na Liverpool igitego 1-0, mbere gato yo gusezererwa na Manchester City muri ½ cya FA Cup.
Kieran McKenna, Roberto De Zerbi na Thomas Tuchel mu mazina avugwa kwicara ku ntebe y’ubutoza bwa Chelsea
Umutoza wa Ipswich Town, Kieran McKenna unaherutse kwegukana igihembo cy’Umutoza wahize abandi muri Shampiyona y’Icyiciro cya Kabiri mu Bwongereza, ayoboye urutonde rw’abatoza Chelsea “The Blues ishobora guha akazi.
Uyu mugabo wigeze kungiriza Umunya-Norvege, Ole Gunnar Solskjær muri Manchester United, muri uyu mwaka wa 2023/2024 yazamuye Ipswich Town mu cyiciro cya Mbere mu Bwongereza nyuma yo kuba iya kabiri ikurikiye Leicester City n’amanota 96, ikipe ye ikaba yarinjije ibitego 92 mu gihe yo yinjijwe ibitego 57.
Roberto De Zerbi wamaze gusezera kuri Brighton and Hove Albion na we ari ku rutonde rw’abifuzwa na Chelsea hamwe na Thomas Tuchel uherutse kuyihesha Igikombe cya UEFA Champions League muri 2021 mbere gato yo kumuhemba kumwirukana, akaba yari amaze umwaka umwe atoza FC Bayern München itaragize Igikombe na kimwe itwara muri uyu mwaka.
Urutonde rw’abavugwa muri Chelsea kandi ruriho Enzo Maresca wazamuye Leicester City amaze kuzuza amanota 100, Michel wafashije Girona FC kujya muri Champions League, Sebastian Hoeneß wa VfB Stuttgart ndetse na Thomas Frank wa Brentford.
