Ikipe y’Ingabo z’Igihugu, APR Basketball Club yateye intambwe igana ku gikombe nyuma yo gutsinda iya Patriots Basketball Club amanota 80-78 mu mukino wa gatanu mu ya nyuma ya kamarampaka muri Shampiyona ya Basketball izwi nka “BetPawa Playoffs Finals” ya 2024.
Uyu mukino wari wakoranyirije imbaga mu nzu y’imikino ya BK Arena i Remera mu Mujyi wa Kigali, kuri uyu wa Gatanu tariki 20 Nzeri 2024.
Ni nyuma y’uko kuri uyu wa Gatatu tariki 18 Nzeri 202, Patriots Basketball Club yari yatsinze APR Basketball Club amanota 61-49 BC mu mukino wa kane w’iyi mikino, birushaho gukomeza urugamba rw’igikombe kuko aya makipe yombi yari ahise anganya imikino 2-2 mu gihe haburaga imikino 3 yonyine.
Mu mukino wa Gatanu buri kipe yose yari yakaniye icyakora Patriots yari ishyigikiwe cyane nk’uko bisanzwe iteka muri iyi mikino yatanze APR BBC kwinjira mu mukino ndetse agace ka mbere igatwara itsinze amanota 24-21.
Agace ka kabiri, Patriots yacaga amarenga yo gutsinda uyu mukino, na ko yagatsindiye ku kinyuranyo cyo hejuru kuko yagatsinzemo amanota 30-17; ibyatumye igice cya mbere muri rusange kirangira Patriots BBC iyoboje amanota 54 kuri 38 ya APR BBC.
kugera aha Branch Stephaun wa Patriots BBC yari ayoboye mu gutsinda amanota menshi, 18; agakurikirwa na Kapiteni we Ndizeye Ndayisaba Dieudonne “Gaston” wari umaze gutsinda amanota 13.
Nyuma yo kuva mu kiruhuko, APR BBC yinjiye mu gace ka gatatu mu isura nshya maze ibifashijwemo n’abarimo Umunya-Mali, Aliou Diarra inyagira Patriots ku kinyuranyo cy’amanota 20 kuko yatsinze amanota 20 ku manota 8 ya Patriots.
Patriots yakomeje kugorwa no kuboneza mu nkangara ndetse na William Perry Kiah wari usanzwe uyifasha cyane ntibyamukundira. Iyi kipe y’Ingabo z’Igihugu aka gace na ko yagatwaye ku manota 22 kuri 16; umukino urangira iyi kipe iyoboye n’igiteranyo cy’amanota 80-78 inuzuza intsinzi eshatu muri enye isabwa ngo yegukane igikombe.
Branch Stephaun wa Patriots ni we watowe nk’umukinnyi mwiza waranze umukino nyuma yo gutsinda amanota 36, akanakora “Rebounds” 12.
Umukino wa gatandatu, uteganyijwe ku Cyumweru, tariki 22 Kanama 2024 muri BK Arena, aho APR FC isabwa gutsinda ikisubiza Igikombe cya Shampiyona; ibiyihesha amahirwe yo kuzahagararira u Rwanda mu mikino wa Basketball Africa League izaba iri gukinwa ku nshuro ya 5.
