Ikipe y’Ingabo z’Igihugu, APR FC yemeje Umunya-Serbie Darko Novic nk’umutoza wayo mu myaka 3 iri imbere, asimbuye Umufaransa Thierry Forger Christian wasoje umwaka umwe w’amasezerano maze ikipe igahitamo kutamwongera andi.
Ni amakuru iyi kipe yanyujije ku mbuga nkoranyambaga zayo kuri uyu wa Gatanu taliki 21 Kamena 2024.
Darco Novic w’imyaka 52 na ‘License’ ya UEFA Pro, yaherukaga gutoza ikipe ya Al-Bukiryah FC ikina Shampiyona y’Icyiciro cya Kabiri muri Arabie Saoudite nubwo yaje gutandukana na yo muri Gashyantare [2] uyu mwaka.
Uyu Munya-Serbie bitandukanye n’uwo aje asimbura Thierry Forger Christian wari wahawe umwaka umwe, Darko Novic yahawe amasezerano y’imyaka 3 aho afite mu nshingano ze kubaka ikipe nk’umushinga ukwiye gusiga APR FC ifite ijambo muri Afurika.
Darko Novic afitanye amateka na APR kuko yahoze ari umutoza wa US Monastir yo muri Tunisie ubwo yasezereraga APR FC muri CAF Champions League ya 2022, nyuma y’uko APR FC ibifashijwemo na Mugunga Yves yari yamutsinze igitego 1-0, gusa muri Tunisie akaza kuyiturukana inyuma akayitsinda ibitego 3-1.
