Ikipe y’Igihugu y’u Rwanda, Amavubi y’Abakina imbere mu Gihugu yakoze imyitozo yayo ya mbere yitegura imikino ibiri ifitanye na Djibouti mu ijonjora rya mbere ryo guhatanira kuzitabira Igikombe cya Afurika cy’Abakina imbere muri za Shampiyona z’iwabo, CHAN 2024.
Ni nyuma y’amasaha make bageze mu mwiherero watangiye ku Gicamunsi cyo kuri uyu wa Mbere tariki 21 Ukwakira 2024, mu gihe urutonde rw’abakinnyi 26 Umutoza Frank Torsten Spittler azifashisha rwari rwashyizwe ahagarara tariki 20 Ukwakira.
Iyi myitozo yitabiriwe n’abakinnyi bose n’ubwo abakinira AS Kigali batayikoze neza kimwe n’abandi kuko bahageze batinze bitewe n’umukino babanje gukina Vision FC bakayitsinda ibitego 2-1 bikabahesha kwicara ku mwanya wa mbere muri Shampiyona by’agateganyo.
Umunyezamu, Hakizimana Adolphe; Iyabivuze Osée [wanatsinze Vision FC igitego], Ndayishimiye Thierry na Ndayishimiye Didier bageze ku myitozo yaberaga ku Kibuga cy’imyitozo cya Stade Nationale Amahoro, bakora imyitozo yoroheje yo kunanura imitsi gusa mu gihe abandi bakoraga isaba imbaraga.
Umukino ubanza wo mu ijonjora ry’ibanze uzakinwa tariki ya 27 Ukwakira, mbere y’uko Amavubi y’u Rwanda yakira “Riverains de la Mer Rouge” ya Djibouti tariki ya 31 Ugushyingo; imikino yombi ikazabera muri Stade Nationale Amahoro i Remera bitewe n’uko Djibouti iri mu bihugu 11 CAF yemeje ko nta Stade bifite zo kwakira imikino mpuzamahanga yo ku rwego rwa FIFA na CAF.