Ikipe y’Ingabo z’Igihugu, APR Basketball Club yegukanye Igikombe cya Shampiyona ku nshuro ya 15 nyuma yo gutsinda iya Patriots Basketball Club amanota 73-70 mu mukino wa gatandatu mu ya nyuma ya kamarampaka muri Shampiyona ya Basketball izwi nka “BetPawa Playoffs Finals” ya 2024.
Uyu mukino wari wakoranyirije imbaga mu nzu y’imikino ya BK Arena i Remera mu Mujyi wa Kigali, kuri iki Cyumweru tariki 22 Nzeri 2024.
Mu kwanzika umukino, APR BBC yari yahisemo kwifashisha Isaiah Muller, Shema Bruno, Chris Ruta, William Robenys, Nshobozwabyosenumukiza, Bush Wamukota, Ntore Habimana, Axel Mpoyo, Dan Manzi, Diarra Aliou Fadila na Shema Osborn, yatangiranye imbaraga zidasanzwe, cyane ko yari izi neza ko gutsinda uyu mukino biza kuyihesha igikombe cya Shampiyona.
Ku rundi ruhande, Patriots BBC ya Nyamwasa Bruno, Furaha Cadeaux de Dieu, Prince Ibeh, Sagamba Sedar, Branch Stephanus, Ishimwe Emmanuel, Kamndoh Frank, Kenny Gasana, NIYONSABA Bienvenue, Kamilindi Oliver, Hagumintwari Steven na Kapiteni Ndizeye Ndayisaba Dieudonné “Gaston”, yari izi neza ko niza gutsinda uyu mukino, yongera kugira amahirwe 50% yo kwegukana igikombe.
Agace ka mbere kaje kurangira Patriots BBC iri imbere n’amanota 19 kuri 17 ya APR BBC, aka kabiri karangira APR BBC itsinze amanota 19 kuri 14 ya Patriots BBC, igice cya mbere kirangira APR BBC iri imbere n’amanota 36 kuri 33 ya Patriots BBC.
Mu gace ka gatatu, APR BBC yongeye kugaragaza inyota y’igikombe, ibuza Patriots BBC kuyisatira. Ako gace nako, karangiye APR BBC igatsinze n’amanota 25 kuri 18 ya Patriots BBC, ku giteranyo cy’amanota 61 kuri 51 ya Patriots BBC.
Agace ka kane, Patriots BBC yagarukanye imbaraga zidasanzwe ishaka gukuramo amanota yatsinzwe na APR BBC, nuko agace ka Kane igatsinda n’amanota 19 kuri 12 ya APR BBC.
Gutsinda agace ka Kane, ntacyo byamariye Patriots BBC, kuko umukino warangiye APR BBC itsinze amanota 73 kuri 70 ya Patriots BBC.
Intsinzi enye APR BBC yasabwaga byahise bituma handikwa ko iyi Kipe y’Ingabo z’u Rwanda yegukanye igikombe cya Shampiyona ya Basketball 2024, itsinze Patriots BBC, ihita ibona amahirwe yo kuzahagararira u Rwanda mu mikino ya Basketball Africa League izaba ikinwa ku nshuro ya gatanu.
APR BBC ikomeje kuyoboza inkoni y’icyuma muri Basketball kuko yandikaga igikombe cya 15 cya Shampiyona. Ikipe iyikurikiye ni Espoir BBC ifite ibikombe bitanu, Patriots BBC ifite ibikombe bine, REG BBC igitego ibikombe bitatu, Kigali Basketball Club igifite inshuro ebyiri, naho Marines ikakigira inshuro imwe.
APR BBC yahembwe miliyoni 15 Frw, Patriots BBC ya kabiri ihabwa miliyoni 7,5 Frw, mu gihe REG BBC yahawe miliyoni 3,5 Frw.
Pitchou Manga wa REG BBC yabaye uwugariye neza na Ndizeye Dieudonné wabaye uwatsinze amanota atatu menshi, mu gihe Henry Mwinuka utoza Patriots BBC yabaye umutoza mwiza w’umwaka.
Isaiah Miller wa APR BBC yahembwe nk’umukinnyi mwiza w’iyi mikino (MVP), anahabwa miliyoni 2 Frw yahawe na BetPawa.
Ni mu gihe, abakinnyi bitwaye neza muri Shampiyona isanzwe (Regular Season), bayobowe na Chadie Bowie wa Kepler BBC wabaye uwahize abandi imibare ivuga ko Chadie Bowie yatsinze amanota 410, yambura imipira 62 “steals”, aba uwa gatatu watsinze igiteranyo cy’amanota atatu menshi 3 [54] aba n’uwa gatatu mu batsinze amanota 2 inshuro nyinshi akuramo 88.