Umutoza w’Ikipe y’Ingabo z’Igihugu, APR FC, Darko Novic yemeje ko abakinnyi babiri bari barahamagawe mu Makipe y’Ibihugu byabo bagizwe n’Umunya-Ouganda, Taddeo Lwanga n’Umunya-Mauritanie, Mamadou Sy bataza kugaragara ku mukino iyi kipe ifitanye na Gasogi United kuri uyu wa Gatandatu.
Yabitangarije mu kiganiro cyakurikiye imyitozo ya nyuma itegura umukino w’umunsi wa gatandatu wa Shampiyona ya 2024/2025 iyi kipe yakoreye i Shyorongi ku Mugoroba wo kuri uyu wa Gatanu tariki 18 Ukwakira 2024.
Uyu mutoza ukomoka muri Sérbie yavuze ko abakinnyi bari bahamagawe mu Ikipe y’Igihugu Amavubi bose bameze neza nyuma yo kugaruka muri APR FC, icyakora Taddeo Lwanga na Mamadou Sy bari bitabiriye ubutumire bw’Amakipe y’Ibihugu ya Ouganda na Mauritanie nk’uko bakurikiranye, bataza kugaragara ku mukino wa Gasogi United.
Ati “Abakinnyi bose bakina mu Ikipe y’Igihugu y’u Rwanda bari hano, dushobora gukora impinduka muri 11 babanza mu kibuga aho abagarutse bameze neza kurusha abandi baza kubanza mu kibuga. Icyakora abandi bakinnyi bari mu makipe y’Ibihugu byabo nka Taddeo [Lwanga] na Mamadou [Sy] bataza gukina uyu mukino.”
“Bageze hano ariko ntabwo biteguye gukina uyu mukino”.
Imibare igaragaza ko Gasogi United igora cyane APR FC kuko yerekana ko aya makipe yombi amaze gukina imikino 7 kuva mu 2019 muri shampiyona. APR FC yatsinzemo imikino 3,banganya 4 mu gihe Gasogi United yo itaratsinda umukino n’umwe.
Muri iyo mikino iyi kipe batazira “Gitinyiro” yinjijemo ibitego umunani naho Gasogi United yo yinjizamo ibitego bitatu. Nubwo bimeze bityo ariko, APR FC iheruka gutsinda Gasogi United muri Shampiyona mu 2022 hakaba hari tariki ya 05 Werurwe aho yayitsinze ibitego 2-0.
Kuri uyu wa Gatandatu tariki 19 Ukwakira 2024 kuva saa Moya Zuzuye, APR FC irakina umukino wayo wa kabiri muri Shampiyona 2024/2025 ihuramo n’iyi Gasogi United kuri Stade Régionale ya Kigali yitiriwe Pelé.
Iyi kipe ifite ibirarane bine bitewe n’igihe yamaze iri mu mikino nyafurika ya CAF Champions League ndetse n’aho igarukiye inanirwa kuvana i Rubavu intsinzi imbere ya Etincelles; ibituma ibarizwa ku mwanya wa nyuma n’inota rimwe.