Ikipe y’Igihugu y’u Rwanda, Amavubi y’umupira w’amaguru yakuye Iradukunda Simeon na Nsengiyumva Samuel bakinira Gorilla FC na Niyongira Patience wa Bugesera FC, mu mwiherero Amavubi ari kwiteguramo imikino ibiri izayihuza nAmakipe y’Ibihugu bya Bénin na Lesotho.
Ni umwanzuro washyizwe ahagaragara ku mugoroba wo kuri uyu wa Mbere taliki 27 Gicurasi 2024, mu mafoto yanyujijwe ku rubuga rwa X rw’Ishyirahamwe ry’Umupira w’Amaguru mu Rwanda, FERWAFA, aherekejewe n’amagambo abashimira akanabahera icyarimwe ikaze na none mu bihe biri imbere.
Uyu mwiherero watangiye ku wa mbere taliki 20 Gicurasi 2024, ubanza kwitabirwa n’abakinnyi biganjemo abakina imbere mu gihugu mu makipe atandukanye bahamagawe n’umutoza, naho abakina hanze y’igihugu bakaba bagikomeje kuhagera mu myitozo iri kubera ku kibugu cya I Ntare giherereye muri aka karere mu murenge wa Nyamata ahazwi nk’i Gahembe.
Aba bakinnyi bazafasha u Rwanda gukina imikino ibiri y’umunsi wa gatatu ndetse n’uwa kane mu itsinda rya gatatu ruherereyemo mu gushaka itike y’igikombe cy’Isi kizaba 2026.
Kugeza ubu Amavubi ayoboye itsinda rya gatatu n’amanota Ane, nyuma yo gutsinda umukino w’Afurika y’Epfo ndetse ikanganya na Zimbabwe, akaba akurikiwe na Afurika y’Epfo, Nigeria, Zimbabwe, Bénin ndetse na Lesotho.
