Umukinnyi w’Umunyarwanda ufatwa nk’umwe mu bagize impano idasanzwe y’umupira w’amaguru, Ishimwe Anicet yerekeje mu Ikipe ya Olympique de Béja iyoboye Shampiyona y’Icyiciro cya Mbere muri Tunisie uyu mwaka w’imikino.
Ibinyujije ku mbuga nkoranyambaga zayo, Olympique de Béja kuri uyu wa Gatanu tariki 21 Nzeri 2024 yemeje ko yasinyishije Ishimwe Anicet amasezerano y’imyaka 3 azarangira muri 2027.
Uyu mukinnyi w’imyaka 21 y’amavuko hari hamaze igihe kinini hibazwa aho yaba aherereye nk’umwe mu bakinnyi batangaga icyizere cyo kuzawuconga ku rwego rwiza. Ku bw’amahirwe abifashijwemo n’uwahoze ari umutoza we, Umunya-Tunisie, Ben Moussa yerekeje muri Tunisie.
Muri rusange, Ikipe ya Olympique de Béja Ishimwe Anicet yasinyiye, yashinzwe mu 1929 ikaba ikinira imikino yakiriye kuri Stade yitwa Boujemaa Kmiti [Stadium] ifite ubushobozi bwo kwakira abantu ibihumbi birenga 15.
Olympique de Béja imaze kwegukana ibikombe birimo 3 by’igihugu, 2 bya SuperCoppa ndetse na 2 bya Shampiyona y’Icyiciro cya Kabiri muri Tunisie, ndetse ubu ikaba imaze gukina CAF Confederation Cup inshuro 2 gusa hose yagarukiye mu mikino y’ijonjora ry’ibanze; icyakora mbere y’uko CAF Winner’s Cup ihindurirwa izina ngo ibe CAF Champions League yageze muri ½ cy’irangiza.
Iyi kipe mu mwaka ushize w’imikino Olympique de Béja yari yabaye iya 7 muri shampiyona mu makipe 16, kuri ubu nyuma y’imikino 2 imaze gukinwa ikaba iri kumwanya wa 1 n’amanota 6 ku rutonde ikurikiweho na ES Zarzis n’amanota 4, mu gihe ikigugu Espérance Sportive de Tunis kiri ku mwanya wa 3 mu gihe igifite umukino w’ikirarane kubera Amarushanwa Nyafurika iri gukina.
