Abagabo batatu bo mu karere ka Gisagara batawe muri yombi na Polisi y’ u Rwanda bakekwaho kwica umugabo bamuciye ijosi nk’ uko byatangajwe na Polisi y’ u Rwanda ikorere muri ako Karere.
Nyakwigendera wishwe yitwaga Abijuru Athanase w’ imyaka 21.
Amakuru avuga ko yishwe nabo bagizi ba nabi avuye aho acururiza arimo yerekeza muri Santeri ha Nyaruteja. Ibi byabereye
mu Mudugudu wa Shyombo, Akagari ka Nyabikenke, Umurenge wa Kigembe, ho mu Karere ka Gisagara, mu ijoro ryo ku wa 29 rishyira ku wa 30 Ugushyingo 2025, aho umugabo wari usanzwe akora akazi k’ubucuruzi bw’inyama na canteen muri santere yitwa Umurangara, ubwo yari asoje akazi yerekeje muri santere ya Nyaruteja, maze ageze mu nzira abantu baramutega baramwica.
Umuyobozi w’Akagari ka Nyabikenke, Nyirakamana Antoinette, yabwiye Itagazamauru ko ubwo uyu mugabo yerekezaga muri santere ya Nyaruteja yageze ahantu hasa nk’ahari umwijima hitaruye ingo hagati y’ikawa, maze abantu bagahita bamutega bakamutema ku ijosi, ndetse banamwambura amafaranga yari afite.
Umuvugizi wa Polisi mu Ntara y’Amajyepfo, CIP Kamanzi Hassan, yatangaje ko uyu mugabo yaba yishwe n’abantu bashakaga kumwihimuraho, kuko bari bazamaze igihe bamuhigira ko bazamuhana.Ati ‘‘Abakekwaho kugira uruhare mu rupfu rwe banafashwe barimo umugabo wahoraga amubwira ko azamwihimuraho aho yahoraga avuga ko yababajwe n’uko aherutse kubafungishiriza umwana.’’
CIP Kamanzi yakomeje avuga ko, umurambo wa nyakwigendera wajyanywe ku Bitaro bya Kibirizi gukorerwa isuzuma, mu gihe abakekwaho kumwica bo bafungiye kuri Sitasiyo ya Polisi ya Nyanza, mu gihe iperereza kuri bo rigikomeje.
Amakuru kandi avuga ko nyakwigendera asize umugore n’ umwana umwe gusa.
